Panimalos?

Gipasakaan na og impeachment complaint si Presidente Rodrigo Duterte sa Magdalo partylist representative sa Ubos Balay-Balauranan nga si Gary Alejano, kaalyado ni Senador Antonio Trillanes II kinsa hingpit nga kritiko sa presidente. Ang kampo ni Duterte mikatawa sa gipasaka nga impeachment complaint human seguradong dili mopasar sa Kongreso nga gidominahan sa mga kaalyado sa presidente.

Si Senador Allan Peter Cayetano niingon nga ang tumong sa impeachment complaint mao ang pagsabwag sa black propaganda sa paningkamot sa paglumpag sa administrasyon.

Niakusar si Cayetano nga pipila ka mga lider, lakip ni Bise Presidente Leni Robredo, ug kaalyado sa Liberal Party bahin sa hiniusang pwersa sa paglangkat ni Duterte sa pwesto. Si Robredo niluwat na isip kalihim sa housing. Ug way ganti sa panimalos gawas sa pagsumbalik? Kagahapon, si Senate President Aquilino Pimentel III niingon nga dunay dakong kahigayonan kon si Robredo ang pasakaan og impeachment complaint.

"Malaki ang tsansa," matod ni Pimentel sa rekasiyon niya sa pamahayag ni House Speaker Pantaleon Alvarez nga nagtuon siya sa posibilidad sa pagpasaka og impeachment complaint batok ni Robredo sa "betrayal of public trust."

Si Pimentel niingon nga ang impeachment complaint nagkinahanglan la og dili minos 100 ka botos sa mga sakop sa House ug si Alvarez ningon nga sila dunay solido nga suporta gikan sa dili mominos 230 ka kongresista. Mao kini giingon nga way-sukod-sa-bawos? Apan dili maayong ehemplo sa mga lider sa nasod ang pagdaut sa usag-usa uban sa tataw nga panag-ilog sa gahom ug salapi gamit ang lehitimo nga isyu sa nasod. Nganong dili hatagan og higayon ang dayalogo ug sabotsabot? Seguradong kalibog mahanaw ug kalinaw motumaw.