On the wings of love

Wa ko makasugakod sa tinan-awan ni Donald nako. Gitutokan ko niya pag-ayo. Nananghid ko kanila ni Gretchen nga mouna sa paggawas sa canteen. Misunod sab si Malou nako. “Hasol gyud, no, Len?” Gikuhit ko ni Malou dihang naglakaw na mi paingon sa among classroom kay wa man koy tingug-tingog. Gipasiplatan ko lang siya.

“Bitaw, uy. Porbida gyud ning gugma, no, Malou? Karon pa gyud ko kasuway nga pagkalisod gyud diay kon ang lake nga gimahal nato duna nay uyab.”

“Correct gyud ka ana, Len. Nakasuway na man ko anang sitwasyona ba dihang fourth year high school ko. Sus, di ko makatu’og og husto inig kagabii, uy, nga maghunahuna sa akong secret love nga may uyab na. Pero nasuta nako nga pup- py love lang diay ang akong gibati niya. Naka- move on dayon ko.”

“Lain man ning akoa, Malou, kay di man puppy love. Tinud-anay gyud ang love ko kang Donald.”

“Aw, lain gyud tuod nang imoha. But naa ra man gyud na nimo ba. Kalimtan mo si Donald o magpadayon ka sa pagmahal niya sa tago nga lisod katagaan og katumanan. Basta, ikaw na lang gyuy maghunahuna anang gibati mo kang Donald.” Wa na lang ko magtingog. Usa ka buntag, sa akong pag-abot sa eskuwelahan, nakita ko sila si Donald ug Mark nga nag-estoryahay sa sulod sa canteen. Mokaon unta ko kay wa man ko mamahaw sa among balay. Apan wa na lang ko modayog sulod sa canteen. Nakita ko silang duha nga seryuso kaayo. Usahay moduko si Donald. Ug nakita ko sab si Mark nga morag nag-alam-alam kang Donald. Nahibulong gyud ko sa akong nasaksihan nilang duha.

Ah, friendly talk lang gyud tingali ang ilang sitwasyon, nakaingon ko sa hilom. Mipakibo ko sa akong mga abaga. Midayon kog sulod sa canteen. Human ko maka- order sa akong pagkaon sa counter, milingkod ko sa lamesa nga layo sa nahimutanagan nila ni Donald ug Mark. Gisundan ko sa pagtan-aw silang duha dihang nanggawas na sila sa canteen. Morag guol ang hitsura nilang duha. Apan wa ko na lang hunahunaa ang akong nasaksihan nilang duha. Sa akong pagtuo, parehas nga dunay problema silang duha.

(SUMPAYAN)