Dugang pundo gipangayo pag-atiman sa protected area sa Sugbo
Nangayo og dugang pundong salapi ang Central Cebu Protected Landscape (CCPL) Board gikan sa nasudnong kagamhanan alang sa pagdumala sa 25 ektarya nga watershed areas sa tungatungang bahin sa Sugbo.
Gawas sa pagpangayo og pundo, naglaraw ang Board nga mokolekta og bayad sa ahensiya o establisementong mokuha og resources sama sa tubig sa protected area.
Mao kini ang nag-una sa mga agenda nga gituki sa tigom sa mga sakop sa CCPL Board kagahapon.
Kini gitambungan sa mga representante sa pribadong sektor, Department of Environment ang Natural Resources (DENR) uban sa Penro, Kapitolyo ug ubang hingtungdang ahensiya sa kagamhanan.
Dakong bahin sa CCPL ang nasakop sa dakbayan sa Sugbo ug lungsod sa Balamban apan duna pa’y ubang bahin sa dakbayan sa Talisay ug Mandaue lakip sa mga lungsod sa Consolacion, Liloan, Compostela ug dakbayan sa Danao.
Ang CCPL mao ang labing dako nga tinubdan sa tubig sa Metro Cebu hinungdan nga gusto sa Board nga mas mapanalipdan ini ug madumala sa insaktong paagi.
Dunay 5-year management
plan ang CPPL Board ug nagkinahanglan og P59 milyones alang sa maong katuyuan.
Apan karong tuiga, wa makaabot og P500,000 o tunga sa milyon ang ilang budget ubos sa Department of Environment and Natural Resources 7.
Nunot niini, nauyonan sa Board nga hangyuon ang National Economic Development Authority (NEDA) ug ang Office of the Presidential Assistant for the Visayas nga motabang paghangyo sa nasudnong kagamhanan nga magahinan sila og pundo.
Si NEDA 7 director, Efren Carreon, niingon hinuon nga kinahanglang gi-apil gyud unta daan sa DENR sa ilang
proposed budget ang item alang sa maong katuyoan.
Gipasalig hinuon niya nga motabang ang ilang ahensiya sa pagpangita ug laing tinunbdan sa pundo nga mahimong magamit sa CPPL.
Kon di makakuha og pundo gikan sa nasudnong kagamhanan, tinguha sa CCPL nga pabayron ang Metropolitan Cebu Water District (MCWD) sa makuhang tubig.