Way dugukan ug baruganan

Sa dihang mayor pa si Mike Rama iyang nakabig sa iyang kampo sila si Konsehal Noel Wenceslao, Gerry Carillo ug Richie Osmeña gikan sa Bando Osmeña Pundok Kauswagan (BOPK) kinsa mao ang majortiy sa Konseho niadtong higayona. Ambot og unsay taktika nga gigamit ni Mike nga iya mang na kombinsi ang tulo ka mga konsihal sa iyang kampo maoy hinungdan nga nahimo nang majority ang Team Rama kaniadto. Usa kadto sa mga rason nganong nakabaligya si Mike sa luna sa South Road Properties (SRP).

Dili na lang kita mamasangil nga nakabig ni Mike ang tulo ka mga konsihal kay iyang gihatagan og dakong kantidad o ba kaha unsay gipasalig ni Mike ngadto kanila. Mao man god na ang daling mosulod sa huna-huna sa publiko nga adunay "malingin nga katarungan" nganong mibali ang maong mga konsihal. Mao usab kini ang pagduda sa katawhan sa dihang milayat ngadto sa BOPK sila si Konsehal Dave Tumulak, Hanz Abella ug karong bag-o si Konsehal Jerry Guardo gikan sa Team Rama.

Sila si Hanz ug Dave mideklarar nga independente kuno sila.

Independente sa ilang kagaral. Klaro naman kaayo nga atoa na gyud sila sa BOPK. Sa kaso ni Dave nga gihatagan og katungdanan nga deputy mayor for police matter, nalingaw na si Dave sa iyang katungdanan kay gusto man sab ni siya nga magpapulispulis. Unya toa na gyud siya permi sa kiliran ni "Laos nga Pulitiko."

Si Hanz sa laing bahin, gihatagan og katungdanan isip deputy mayor for education ug kanunay na nga mokuyog sa mga biyahe sa gawas sa nasud sa kanhi laos nga pulitiko.

Kining pangangkon ni Mike nga ang iya gihapon nga mga kaalyado ang majority sa konsiho, nagdamgo lang siya niini. Daghan ang misaway ning mga mibalitok nga mga konsehal sa Team Rama ngadto sa BOPK kay matod pa walay mga "utang na loob." Nakadaog sila gumikan sa Team Rama apan namalhin man hinoon.

Kanang "utang na loob" wala na sa pulitika. Walay baruganan, dugukan ug prinsipyo kining mga pulitiko.