Hudlat sa demokrasya

Dunay nga opisyal sa mga local government unit (LGU) ang mipadayag sa ilang pagsuporta niining pamahayag ni Presidente Rodrigo Duterte nga dili na lang mopahigayon og barangay election karong tuiga ug iya na lang hulipan ang mga barangay kapitan nga nalambigit sa gidiling drugas sa mga matinud-anon nga mga lider.

Pero nagpasuabi usab ang mga supak niini ilabi na ang kinabag-an sa mga sibilyan kay mora na man hinuon og gikuhaan og katungod ang mga tawo sa pagpili kon kinsa ang gusto nilang mahimong lider sa ilang barangay.

Ubos sa Local Government Code, ang mga tawo gihatagan og katungod sa pagpili sa ilang tagsatagsa ka mga barangay chairman ug mga opisyales nga maoy modala sa renda sa pangagamhanan.

Kon kinsa ang mabutohan sa kadaghanan, buot ipasabot nga siya maoy gihatagan og gahom sa katawhan nga modumala sa barangay.

Samtang atong girespetuhan ang tinguha sa presidente nga mao ang paglimpyo ug paglikay sa mga barangay nga malayo sa pagkatap sa gidiling drugas, dili sab siguro angay na lang niyang yatakan ang katungod sa katawhan.

Kon ang rason niini mao man gani nga dunay mga daghang kapitan ang nalambigit sa pagpakatap sa gidiling drugas, nganong dili man pasakaan og kaso aron pagtino kon tinud-anay ba ang maong alegasyon?

Duna usay mga gobernador ug mayor nga gikatahong nalambigit usab sa gidiling drugas, buot ba ipasabot nga mao usab unya kini himuong rason nga dili na usab mag- election ug ang presidente na usab ang motudlo kon kinsa ang ipuli kanila?

Kini maoy delikado, kay hasta ang mga tarong nga mga lider maapil usab sa ratsada. Ug labaw sa tanan di nato kalikayan ang pagduda ang posibling mahibalik ang pagdag-om sa demokrasya.