Kausaban sa Konseho

Makahimuot ang mga reaksyon sa pipila niining pagbalhin ni Konsehal Jerry Guardo gikan sa Team Rama ngadto sa BOPK. Dunay mokwestyon sa motibo. Kaba-kaba kuno. Way epek sa mayoriya sa Team Rama.

Ang ako lang kay maunsa man ang motibo, mag- denial man ang pipila, walo na lang ang nahabiling mga konsehal sa Team Rama.

Sa pagkakaron, duna nay pito ka mga BOPK. Dunay duha ka independente nga klarong dapig sa BOPK. Buot ipasabot, siyam na sila tanan.

Hinuon, kay nasuspenso pa man si Guardo og tulo ka bulan, mga Hunyo pa siya makareport balik sa Konseho. Buot ipasabot, mahimo pang maka- break sa tie kini si Bise Mayor Edgar Labella sulod sa sunod tulo ka bulan. Moingon sila nga political

butterfly kun kaba-kaba kining mobalhin og partido. Apan bug-at kaayo kining pagka balhina ni Konsehal Guardo kay nakuha na sa BOPK ang mayoriya.

MAKAAPAS

Hinuon, mahimo pang makaapas sa pagbali ang lain pang konsehal sa Team Rama nga makaingon kita nga dunay kabug-aton.

Di ba tabla man ang kadaghanon sa mga konsehal sa Team Rama ug BOPK sulod sa sunod tulo ka bulan? Mahimo dayon kining 7-9 kon dunay mosunod sa pagbalitok.

Mao kiniy hinuktokan sa mga Team Rama. Kinahanglang maghinugtanay sila sa pagpanggunit nga wala nay mosunod sa pagbalitok. Kinsa kaha kini? Kay kining pagbalhin ni Guardo tungod man sa pagduso ni Barangay Kapitan Lemar Alcover sa kasong nakapasuspenso sa konsehal, di na ko motuo nga si Alcover moambak padung sa BOPK.

Nasulbad na ang problema sa Sambag 1 nga pulos kauban ang mag-atbang alang sa pagka barangay kapitan.

Si Konsehal James Cuenco kaha? Yuna pa, di sab tingale. Si Cuenco ra man ang konsehal nga nagpakita og pagsuporta kang kanhi mayor Mike Rama sa press conference niini sa miaging Dominggo.

Apan, diin man sab ang uban? Nagdistansya na sa ilang lider?

KABUNGKAGON?

Atong maaninaw nga daw kabungkagon na ang Team Rama. Imbes magpakita sila og panaghiusa sa maong press conference, usa na lang ang nagpakita nga konsehal.

Ang klarong tigsuporta nila nga si Presidential Assistant for Visayas Mike Dino, atong masabot nga wa molihok aron magkakita silang kanhi mayor Rama ug President Rodrigo Duterte. Kon mopadayag man og suporta, ang nganlan lang mao si Bise Mayor Labella.

Dayon, samtang nagpaduol sila sa administrasyon pinaagi sa pagpahurar isip PDP-Laban, ang ilang kauban sa partido nga si Alcover, hugot man nga tigpanaway sa administrasyon ni President Duterte.

Hinuon, duna man kunoy bag-ong partido nga motumaw alang sa piliay sa 2019. Abangan. (@