Babay Team Rama?

Klaro na. Si Mayor Tomas Osmeña ug ang mga sakop sa Bando Osmeña Pundok Kauswagan (BOPK) nagmaya karon sa pagtapon ni Konsehal Gerry Guardo tungod kay mayoriya na unya og balik ang BOPK sa konseho.

Sori na lang, kanhi mayor Mike Rama, kay wa na man ka sa poder ug gidudahan pa ka nga drug lord protector ni Presidente Duterte. Miabot na ang panahon nga mobiya ang imong mga kauban sa Team Rama bisan og mipasalig sila nga loyal sa imong pundok.

Gihimo ni Guardo nga rason nga motapon sa BOPK ang pagsuspenso kaniya sa Department of Interior and Local Government (DILG) og tulo ka buwan sa sala nga iyang nabuhat samtang kapitan pa siya sa Sambag 1. Si Barangay Kapitan Lemar Alcover ang iyang gituhoan nga maoy midumbol sa DILG aron siya masuspenso.

Apan ang posible nga wa matugkad ni Guardo mao kon kinsa ang tinuoray nga nagpaluyo sa iyang suspension. Daghan ang nagduda nga usa ka maniobra ang pagsuspenso kang Guardo aron madali ang iyang pagpasakop sa BOPK.

Si Guardo mismo nahibung nganong gisuspenso siya sa DILG nga ang decision sa Ombudsman mao man lang ang pagmulta kaniya bali og tulo nga ka buwan nga sweldohan sa kapitan.

Pag-abot sa DILG ang multa nahimo na nga suspenso. Morag magic no?

Apan matod ni Rama, kinsa akong nakahinabi niadtong Sabado samtang nagkasakay mi sa ayroplano padung sa Cebu gikan sa Manila, wa siya mahibong nga mobali si Guardo kay usa siya sa upat ka mga konsehal sa Team Rama nga gipuntariya nga kuhaon sa BOPK. Ang upat mao sila Konsehal Hans Abella, Dave Tumulak, Guardo ug si ABC president Philip Zafra.

Si Abella ug Tumulak una nga mibiya sa Team Rama sa pasumangil nga mag-independente sila. Si Zafra di madugay moapas sa tulo.

Si Zafra nalakip sa kiha sa dakbayan batok sa mga kapitan nga wa mouli sa sakyanan nga iya sa City Hall nga gimando ni Konsehal Margot Osmeña sa miaging tuig nga siya ang acting city mayor kay nasuspenso man si Rama ug Bise Mayor Edgar Labella.

Sa karon nga ihap bisan og di pa mobalhin si Zafra, nga usa sa mga sinaligan ni Rama kaniadto, modaug na ang BOPK kon dunay ilang gusto nga ipasar nga ordinansa o resolution sa Konseho kay lakip si Abella siyam na sila.

Apan lagi kay si Mayor Tomas sigurista man ug aron makuha ang duha ug tolo ka bahig mao nga iya gyung kuhaon si Zafra. Sayon na kaayo pasakyon si Zafra sa BOPK. Ang buhaton sa city attorney mao ra ang pagtangtang ni Zafra sa maong kiha.