May kahayag ang ugma
Usa ka semana na lang sa dili pa ang adlaw sa pagtapos ni Jonas sa kolehiyo. Tugob sa kahinam ang among galamhan ni Juanito nga nagpaabot sa maong higayon.
“Mogradwar na gayud ang atong kamanghuran, Juanito,” mora kog gihagwag anghel nga magbalantay nga nakigsulti sa kapikas. “Matapos na gyud ang atong pag-antos sa pagpangitag ikabayad sa matrikula, plete, ikapalit og libro ug ubang gamit sa pagtungha.”
“Tinuod kana, Remedios, apil na ang bawon. Makaginhawa na gyud tag luag ani,” dason sa akong bana. “Dakong dungog nato ang kalampusan ni Jonas.”
Bachelor of Science in Hotel and Restaurant Management (BSHRM) ang among kamanghoran sa University of Cebu. Siya ray gapili ning maong kurso.
Mag-uuma lang ang among panginabuhi sa bukirang bahin sa Balirong, siyudad sa Naga. Aduna kami gamayng luna nga gipanamnag mais, balanghoy ug kamote. Naa usab kamiy binuhing mga kabaw, baka, kanding ug manok. Mao kiniy gisandigan sa among pagpuyo ni Juanito sa banika. Tulo ray nahimong bunga sa among pagminahalay. Ang duha ka maguwang ni Jonas, si John Remo ug Jonathan, nangaminyo na ug wala makahuman sa ilang pagtungha sa kolehiyo. Amoa gyong gipangandaman ni Juanito ang gradwasyon ni Jonas. Bisag monas ginhawa, nagtagana kamig gamayng piging sa among panimalay. Among gipangdapit ang mga kabanay ug pipila ka suod nga higala ug silingan.
Puyra buyag, maayo og pangutok si Jonas. Gani kanunay man siyang mahonor gikan sa elementarya ngadto sa hayskol. Ug karon sa kolehiyo, matod sa among anak, usa siya sa mga mopaso nga Cum Laude, butang nga nakapabayaw og samot sa among garbo ni Juanito.
“Ayaw lang mo kabalaka, Nay, Tay, kay kon makatrabaho ko, tabangan gyod ta mo,” pasalig sa ulitawo. “Dili ako magdali-dali og minyo sukwani sa akong mga maguwang. Gusto kong mobalos sa inyong kaayo ug pagpatulo og singot alang sa akong pag-eskuyla. Utang ko kaninyo kining akong kalampusan.”
NAGDASOK sa mga tawo - mga tinun-ang mogradwar, mga ginikanan ug ubang kabanay ug mga tumatan-aw - ang hawanan sa Cebu Coliseum sa adlaw sa gradwasyon ni Jonas. Kay gawas ugod sa BSHRM, gidungan man usab ang gradwasyon sa ubang kurso. Gani naglisod sila pagpangitag kalingkoran.
Sa wala pa ang pagpanghatag sa pasidungog niadtong mga honor student lakip na sa mga special award, namarog ang tanang estudyante ug ming-awit sa ilang graduation song. Pagtawag sa ngan ni Jonas, namarog dayon kami ni Juanito, misaka sa bantawan, aron pagsab-ong adtong giandam nga medalya ngadto sa liog sa among anak kinsa angayan kaayo sa gisul-ob niining itom nga toga. Sa wala pa kami manganaog sa bantawan, nagpahulagway una kami niadtong potograper nga nag-atang sa ubos aron duna kamiy handumanan.
Misantop sa akong hunahuna nga ang gradwasyon ni Jonas may kaluhang kahayag alang sa maayo niyang kaugmaon.