RESEARCH SA MGA TINUN-AN SA USC MIDAUG
Midaug sa ikaduhang dapit ang mga tinun-an sa Chemical Engineering (ChE) sa University of San Carlos (USC) sa Undergraduate Research Competition atol sa nasudnong panagtigio sa mga tinun-an sa ChE.
Nagkatipon ang mga tinunsa ChE sa tibok nasod niadtong Pebrero 22 sa Limketkai Luxe Hotel sa dakbayan sa Cagayan de Oro.
Usa kini sa pasiuna sa mas dakong panag-abot sa mga sakop sa Philippine Institute of Chemical Engineers (PIChE) sa samang dapit.
Naangkon nila ni Angelique T. Conag ug Jaye Earl R. Villahermosa, nga anaa na sa ika-5 nga tuig sa kursong ChE sa USC, ang pag-uyon sa mga hukom sa ilang sinuhid nga “Torrefaction of Sugarcane Bagasse and Development of Predictive HHV Model.”
Napiling kampyion sa maong panag-indigay ang giduso sa UP Diliman, samtang ang ikatulo ang gikan sa Adamson University.
Gibutyag ni Villahermosa gipangita sa iyang grupo sa Biomass and Biofuel Engineering ang kasulbaran sa kasamtangang problema pinaagi sa waste biomass valorization, ilabi na sa pagkabig niini nga mamahimong pangsugnod (biofuel).
“Nasuta namo ang dakong mahimo sa mga inusik sa agrikultura, ilabi na sa bagaso sa tubo, nga maoy labing tinanom dinhi sa Sugbo ug sa tibook nasud,” siya nipahayag.
“Nahukman sab namo nga mangita’g laing kapilian sa uling kay dili kaayo hinisgutan ang paggamit sa solid biofuels nga susama sa liquid biofuels, sama pananglit sa biodiesel ug bioethanol,” nidugang si Villahermosa.
Dunay tulo ka ang-ang ang kompetisyon.
Una, giduso sa mga nangapil ang ilang tanyag, kon
abstract, sa miaging Disyembre. Dayon gipili sa mga tigpasiugda ang 23 niini nga gikan sa mga nagkalainlaing mga tulunghaan sa chemical engineering lukop sa nasud, tulo niini gikan sa USC.
Gilangkoban ang ikaduhang bahin sa pagpasundayag sa pahibalo kabahin sa ilang sinuhid pagkabuntag sa adlaw sa panag-indigay.
Gipili niini sa tulo ka maghuhukom ang tulo sa mga pianakamaayong research alang sa katapusang yugto.
Kini mao ang pagpanalipod sa ilang mga sinuhid atubangan sa maong mga maghuhukom ug sa pagtubag sa ilang mga pangutana. PAAGI Nipakigbahin si Conag nga ikaduhang tumong lang nila nga makadaug. “Mas gilantaw namo ang student congress nga paagi nga mapasundayag namo ang among gitun-an harun mapa-ambit namo ang among nahibala-n,” siya nagkanayon.
Gipasabot niya nga buot sa ilang grupo nga mapakita ang kahimoan sa Pilipinas kabahin sa renewable energy.
“Buot namong mapa-ambit unsaon nga magamit ang mga sinalin sa agrikultura nga mamahimong tinubdan sa enerhiya,” nidugang si Conag.
Gihatagan og dakong bili sa tigtambang nila nga si Dr. Alchris W. Go, Ph.D. ang ilang nasinati bisan man lang sa naangkong ikaduhang dapit.
“Mabuksan ang mga kahigayonan sa pagkamapainubsanon, makatabang ang paggiya sa paghawan sa dalan, ug nagdala ang kakugi ngadto sa mas dako nga mga kahitas-an,” siya nipadayag.
Gihimug-atan ni Engr. Luis K. Cabatingan, chairman sa USC ChE Department, nga kanunay giisip nga positibo ang mga sinuhid sa mga tinun-an sa USC sa maong panag-indigay bisan sa panagsa nilang pagsalmot.
Gibutyag niya nga nakaduha ug nakatulo ang mga sinalmot gikan sa USC sa tuig 2004 didto sa Makati, nakaduha pagka 2010 sa Tagaytay, ug naapil sa top six pagka 2015 didto sa Boracay.
“Nagpakita kini sa kalidad sa research nga binuhat sa atong mga tinun-an. Mapasalamaton ta sa mga kahigayunan nga makapakigbahin sa mas dako nga mamiminaw niining mga talalupangdong buhat,” namahayag si Cabatingan.
Nalakip sa mga finalist ang mga sinuhid sab nilang Glory Mae Bureros, April Tanjay ug Dan Elmer Cuizon, ug ingon man nilang Christine Jenica Dy ug Alyssa Faye Go, pulos 5th year nga mga tinun-an sa ChE sa USC.
Ang USC usa sa nag-unang tulunghaan sa ChE sa nasud. Giila sa Commission on Higher Education (CHEd) ang programa niini nga usa ka Center of Excellence in Chemical Engineering.