Laing di iladong boksidor nanghagit ni Pacquiao

Laing dili ilado nga boksidor ang gustong mokuha og pahat sa publisidad pinaagi sa paghagit ni Filipino boxing icon ug eighttime divison champion Manny Pacquiao.

Ang South African fighter nga si Chris van Heerden, nga sama kang Australian Jeff Horn, ang nalakip karon sa mga posibling makontra ni Pacquiao ning tuiga.

Samtang wa pa makapili og kontra si Pacquiao sa upat ka mga pilianan nga gisugyot sa iyang promoter nga si Bob Arum sa Top Rank nga gikatakda karong Hunyo o Hulyo, si Van Heerden mipadayag sa iyang kaandam nga makigsangka ni Pacquial karong Nobiyembre.

Matod pa sa taho sa citizen. co.za, si Van Heerden misumiter na sa iyang proposal ngadto ni Arum karong semanaha diin naglakip kini og $25 million nga ganti ug posibling adto ipahigayon sa First National Bank Stadium nga naila usab nga Soccer City sa Johannesburg nga makasulod og 95,000 ka mga tawo.

Sama kang Horn nga nakakuha usab og igong suporta sa city government sa Brisbane, Australia, ang grupo ni Van Heerden misandig usab sa suporta gikan sa South African government, pinaagi ni Sports Minister Fikile Mbalula.

Pero ang pangutana kon haom ba si Van Heerden nga makigsangka ni Pacquiao?

Sigon sa natala sa BoxRec, SI Van Heerden adunay 25 ka daog, duha ang pildi ug usa ka tabla. Siya ang kanhi International Boxing Organization welterweight champion ug kasamtangang WBA Pan African titlist.

Walhon ug manghod og siyam ka tuig ni Pacquiao apan may gitas-on kini nga 5-9.

Laing nakalinya ni Pacquiao sa Nobiyembre mao si Amir Khan kinsa una nang gikataho nga maoy makigsangka ni Pacquiao karong Mayo sa United Arab Emirates apan kini wa mahinayon.

Ang maong negusasyon mao usab ang rason kon nganong wala mahinayon ang away nila ni Horn ug Pacquiao nga mao unta ang gilihok ni Arum. Samtang si Arum nagtinguha sa Pacquiao-Horn fight, ang laing sinaligan ni Arum nga si Michael Koncz nakig- negotiate usab sa UAE apan napalpak.