HOME COURT ADVANTAGE
Mihayag og samot ang poruhan sa host Golden State Warriors nga maangkon ang No.1 overall human nila gipangmakmak ang Memphis Grizzlies, 106-94, kagahapon sa National Basketball Association (NBA). Ang Warriors mingsaka sa 59-14 nga rekord ug ilang nainat ang ilang bintaha ngadto sa 2-1/2 ka mga duwa sa nagsunod niini nga mao ang San Antonio Spurs sa inilugay sa No.1 overall. Ang makaangkon sa No.1 overall human sa regular season makapanag-iya og homecourt advantage sa tibuok playoffs.
Pinaagi sa ilang pilit nga depensa, napabulhot sa Warriors ang ilang opensa sa 2nd
half aron kontrolahon ang Grizzlies.
Gipangulohan ni Klay Thompson ang kadaugan pinaagi sa iyang 31 puntos, 21 niini iyang namugna sa 2nd half.
Midugang og 21 puntos si Stephen Curry alang sa Warriors, nihatag og 20 puntos si Andre Iguodala samtang nitunol og 10 puntos si Matt Barnes.
“We just picked up our intensity,” batbat ni Warriors coach Kerr. “Most of the second half, I thought our defense was much better. That fueled our offense a little bit. When we can get stops and get out and run and hit a couple of 3-pointers, that really gives our team a good charge.”
Ang Warriors aduna na lay siyam ka mga duwa nga nahabilin sa regular season apan wala pa sila’y rason nga magmayag gumikan kay ikaparang nila ang lig-ong team nga mao ang Houston Rockets (kaduha),
San Antonio ug Washington Wizards sa magsunod nilang upat ka mga duwa.
“At this point in the season and the playoff teams that we have coming up, it gets you into that focus mode,” asoy ni Curry. “It’s a good warmup for us to understand how important each game is, each possession is, and not look ahead. That’s playoff mentality.”
Ang Warriors padayong ningkombati nga wala ang usa sa ilang labing sinaligan nga si Kevin Durant, kinsa kasamtangang nagpaalim sa iyang angol.
Ang Grizzlies, nga kaduha ningpukan sa Warriors sa wala pa ning sangkaa, nagpabilin sa ikapitong dapit sa Western Conference dala ang 40-33 nga rekord.
Gipangulohan ni Mike Conley ang Grizzlies pinaagi sa iyang 29 puntos, nidugang og 15 puntos si Zach Randolph samtang niamot og 13 puntos si Jaymachal Green.
Ang Grizzlies nakasikit sa nag-unang tulo ka quarters apan wala sila nakapanagang sa kabangis nga gipakita sa Warriors.