DRIVER'S LICENSE 'DI ANGAY KUHAON'

ORDINANSAHON GISUPAK SA DRIVERS, NASUKWAHI SA BALAUD

Gisupak sa mga drayber ug operator ang tinguha sa Cebu City Council nga masakmit sa mga traffic enforcer ang mga lisensiya sa pagmaneho sa higayon nga makalapas sila og lagda sa trapiko sa dakbayan sa Sugbo.

Si Konsehal Eugenio Gabuya Jr. maoy nagduso sa ordinansahon sa tumong nga malikayan ang mga disgrasya sa kadalanan ug mahapsay ang dagan sa trapiko.

Apan sa mga mamumolong, walay nidapig pabor sa maong ordinansahon sanglit para kanila nakasupak kini sa nasudnong balaod.

Di usab kini ang haom nga solusyon ug nakalapas sa ilang tawhanong katungod.

Si Greg Perez sa Pagkakaisa ng mga Samahan ng Tsuper at Operators Nationwide (Piston-Cebu) nagkanayon nga kon ipatuman sa Cebu City ang maong ordinansa, dako kining problema para kanila.

Iyang gibutyag nga kon madakpan sila sa Cebu City, inig abot nila sa dakbayan sa Mandaue, Lapu-Lapu ug ubang mga local government unit, depende sa ilang gidrayban nga public utility vehicle wala na silay lisensiya. Kon madakpan na usab sila sa mga enforcer sa maong LGU, wala na silay ikahatag ug mamahimo pang ma-impound ang ilang sakyanan ug wa na silay ka-drayban.

Nagkahulogan nga mapasmo ang ilang pamilya.

Si Atty. Glenn Capanas, kinsa maoy representante sa Airland Taxi, nagkanayon nga ang maong ordinansahon nakalapas sa Republic Act 4136 kun Land Transportation and Traffic Code.

Matod pa ni Capanas nga ubos sa Section 29 sa mao nga balaud, walay gitugotan nga LGU sa pagsakmit sa driver’s license.

Ang makahimo ra niini mao ang mga law enforcer o traffic enforcers nga gihatagan og katungod sa Land Transportation Office (LTO).

Apan ang LTO niputol na sa deputation sa pipila ka mga volunteer.

Nalatid usab sa Section 62 nga gidid-an ang mga LGU sa paghimo og ordinansa nga makasupak sa maong balaod.

Dugang ni Capanas nga walay statistics nga nagpamatuod diin ang pagsakmit og lisensiya sa mga drayber nakapaubos sa aksidente.

Si Ryan Benjamin Yu, chairman sa Cebu Integrated Transport Cooperative (Citrasco), nisuporta sa pamahayag ni Perez ug Capanas sanglit ang ilang gilantaw mao ang kaayuhan sa ilang mga drayber uban sa pagbutyag nga nagsunod sila sa mga lagda sa trapiko. /