DAGHANG KAPITAN NAA SA DRUGAS?
Daghang kapitan ug mga barangay official sa Central Visayas ang giingong nalambigit sa ilegal nga drugas nga nalakip sa listahan ni Presidente Rodrigo Duterte nga gitugyan ngadto sa Philippine Drug Enforcement Agency (PDEA 7).
Giangkon ni PDEA Director General Isidro Lapeña nga kompirmado nga dunay mga kapitan sa Central Visayas nga nalakip sa ilegal nga drugas.
Wala mohingan ug motugan si Lapeña kon kinsa ug pila ka mga barangay kapitan ang nangalambigit.
Apan iyang gipaniguro nga di lang kapitan, lakip na usab ang ubang mga opisyal nga iyang gihulagway nga niduwa sa ilegal nga drugas.
Dali ra, matod pa mailhan, kinsa kadtong mga kapitan nga nagprotihir o nalambigit sa ilegal nga drugas kay sila di motabang sa kampanya sa kapulisan ug PDEA.
“We have a list but di ko ma reveal at ma divulge ang mga pangalan,” matod ni Lapeña.
Si Regional Director Yogi Filemon Ruiz nga nakabasa na sa listahan nga gihatag sa iyang labaw, nitug-an nga duna siyay nakita nga mga kanhi barangay official sa Sugbo ug sa mga silingan nga probinsya.
Gani, dunay tag-as nga mga opisyal sa gobierno nga nalakip sa listahan nga ila una nga ipaubos sa subsub nga background investigation.
“More than barangay chairman, naa puy mga labaw pa, naa puy mga former elected officials that are already being investigated,” matod Ruiz.
Sa tibuok nasud, dunay 40 porsiyento sa kinatibuk-ang barangay kapitan nga nalambigit sa pagpamaligya sa ilegal nga drugas.
Tungod niini, uyon si Lapeña sa mga pamahayag ni Duterte nga ioktaba lang una ang barangay ug Sangguniang Kabataan elections.