Guardo gihangop, gipartihan sa BOPK
Daw sama sa usa ka aktor si Konsehal Jerry Guardo sanglit siya ang sentro sa atensyon atol sa gipahigayon nga welcome party celebration alang sa bagong kaalyado sa Bando Osmeña Pundok Kauswagan (BOPK) sa Adnama Hotel sa dakbayan sa Mandaue niadtong Lunes sa gabii.
Si Mayor Tomas Osmeña mismo nikompirmar nga ang maong pagtapoktapok sa mga sakop sa BOPK nga gitambungan nilang Kongresista Raul del Mar sa north district ug Rodrigo “Bebot” Abellanosa sa south district tipik sa ilang paghangop kang Guardo.
Gawas kang Jerry, didto usab ang iyang mga igsuon nga silang magpapatigayon Jonathan “Atan” Guardo, Jeson Guardo ug ilang mga asawa ug mga anak.
Nitambong usab ang ilang mga kaalyado sa konseho nga gipangulohan ni Konsehal Margarita Osmeña, asawa ni Tomas.
Wala makatambong si Konsehal Hanz Abella gumikan sa wala pa matino nga rason.
Ang mayor nalipay sa pagtapon ni Guardo sa ilang pundok sanglit sila na ang mayoriya sa konseho ug sa maong sitwasyon makapadayon na sila sa ilang maayong tinguha para sa dakbayan.
Usa sa unang lakang ni Osmeña mao ang pagkanselar sa kontrata tali sa Siyudad ug sa tulo ka dagkong developers nga maoy nakapalit sa 45 ektaryas nga yuta sa South Road Properties nga nabaligya atol sa administrasyon ni kanhi mayor Michael Rama diin ang lakang sa mayor nagkinahanglan og pagtugot sa Konseho.
Si Guardo nibiya sa Team Rama human siya gisuspenso sa Department of Interior and Local Government (DILG) pinasikad sa hukom sa Ombudsman sa kasong simple neglect of duty dihang natapos na ang iyang termino.