Suspek sa pagpanulis nasikop sa Talisay City

Suspek sa pagpanulis sa dakbayan sa Sugbo nasikop sa barangay Tangke, dakbayan sa Talisay diin sa samang higayon nakuhaan usab kinig shabu ug armas.

Pasado alas 10:00 sa gabii sa Marso 27, ang kapulisan sa Talisay nakadawat og report labot sa presesnya sa armadong tawo sa may sityo Magay, barangay Tangke.

Mireposndi ang mga pulis ug didto nasikop sila si Romvic Belleza Hermoso, 32, taga sityo Tugas, Barangay Inayawan, Cebu City, kinsa nakuhaan og .9 mm pistol ug plastic nga ang sulod gituohang shabu.

Ang laing nasikop nga giingong drayber sa motorsiklo nga iyang gisakyan mao si Lym Lester Manait Dela Paz, 20, taga Barangay San Roque, Talisay City. Nakuhaan usab kini og usa ka putos sa gituohang shabu.

Matod pa, si Hermoso aduna nay record ug maoy responsabli sa pagpanulis sa Cebu City ug napriso kini niadtong 2009.

Ang kapulisan nagtuo nga ang tuyo sa duha sa dapit mao ang ilegal nga drugas.

Si Hermoso mihimakak nga aduna siyay shabu apan niangkon nga iya ang armas. Matod niya iya kining self defense sa iyang pag-adto sa lugar tungod kay iya gipangita ang iyang kapuyo nga taga Tangke.Si Dela Paz mihimakak nga kauban sila ni Hermoso, apan miangkon nga iya ang shabu tungod kay nipalit siya og shabu alang sa iyang konsumo. Ang mga dinakpan gitanggong na sa Talisay Detention Cell samtang tukmang kaso gipasaka na kagahapon batok nila. / DRT