LANDFILL SA BINALIW GIPAUNDANG
Gipaundang sa Environmental Management Bureau (EMB) sa Department of Environment and Natural Resources (DENR) ang pagtukod sa sanitary landfill ug power generation
facility nga naglagbas sa dakong bukid sa barangay Binaliw, dakbayan sa Sugbo gumikan sa kakuwang sa permit. Base sa gihimong inspection sa EMB, nasuta nga bisan kon wala pay environmental compliance certificate (ECC) ang contractor, nagsugod na sila og trabaho.
Ang cease and desist order (CDO) nga gipirmahan ni DENR Regional Director Anecita Dinoy, niadtong Marso 27 gipada ngadto kang Arnold Espinosa, tagiya sa ARN Builders nga maoy nag-ugmad.
Gawas sa pagpahunong sa ilang on-going construction, ang ARN Builders pa-isplikahon sa EMB kon nganong dili sila angay pahamtangan og silot gumikan sa ilang gibuhat diin sila ipatawag sa kadagkuan sa DENR karong
Abril 5, para sa usa ka technical conference.
Ang EMB nipahunong sa ilang padayon nga pagtrabaho aron di kini makahatag og dugang danyos sa bukid ug makapadayon lang sila og trabaho kon makakuha na sila og ECC.
Si Kapitan Wilson Bacor sa Binaliw niisyu og CDO niadtong Marso 24 aron ipahunong ang ilang pagbungkag sa bukid nga way pagtugot sa hingtungdang ahensiya.
Matod pa ni Bacor nga base sa ilang aplikasyon didto sa barangay, usa ka material
recovery facility ang itukod sa maong lugar apan si Konsehal Joel Garganera nagtuo nga usa kini ka landfill.
Ang nakapaalarma ni Bacor ug Garganera mao ang pagreklamo ni Milagros Englis, diin ang iyang tulo ka ektaryang yuta giapil og trabaho sa ARN Builders nga wala sa iyang pagtugot.
Gibutyag ni Bacor nga nakatampo kini sa pagkaguba sa karsada sa sityo Tapuko sa Pit-os diin adto moagi ang ilang dagko nga dumptruck nga magkarga og yuta uban sa sa Binaliw I. /