'Mamalitay' og kinawat gipusil patay; mamumuno nag-atang sa agianan

Lalake nga giingong mamalitay og kinawat nga mga butang sa dakbayan sa Talisay gipusil patay sa wa mailhing lalake niadtong Lunes sa gabii sa sitio Mananga 2, Barangay Tabunok, dakbayan sa Talisay.

Ang namatay sa usa ka samad pinusilan giila sa kapulisan nga si Roque Dula, 50, minyo, nagpuyo sa nahisgutang lugar.

Matod ni PO1 John Xyrus Ilustrisimo sa Talisay City Police Station nga gikan nangumpra sa merkado sa Tabunok si Dula sakay sa iyang motorsiklo padung nga mopauli.

Sa iyang pag-abot sa dulhugon nga bahin sa dan dayong sulod sa ilang lugar, gipusil siya sa mamumuno nga nagsul-ob og jacket makausa ka higayon.

Ang mamumuno daan nang nag-atang kang Dula.

Daling gidala sa tambalanan sa mga tawo sa dapit si Dula.

Apan gideklarar siya sa mga doktor nga patay nang midangat sa tambalanan tungod sa samad sa ulo.

Sigun sa mga nakakita sa hitabo, ang nag-inusarang gunman yanong nisibat human sa pagpusil.

Asoy pa ni Ilustrisimo nga posibleng aduna’y naglagot kang Dula tungod sa iyang kalihukan nga maoy mopalit og mga butang nga kinawat nga ibaligya kaniya.

Apan iyang gitataw nga aron masuta kon unsa gyud ang motibo, nagpadayon pa ang ilang imbistigasyon sa pagsuta kon kinsa responsabli sa pagpatay.