Uber, Grab, LTFRB

Makalibog kining polisiya sa Land Transportation Franchising and Regulatory Board (LTFRB) bahin sa operasyon sa Uber ug Grab, mga kompaniya sa transport network vehicle service nga nigamit sa bagong teknolohiya o app. Uso kini sa gawas sa nasod ug ang ilang presensiya walay bikil tali sa naandan nga taxi service.

Ang Uber ug Grab nia na usab sa Sugbo. Mikusog ang ilang operasyon human kadaghanan sa mga pasahero matagbaw sa pagpaabot og bakante nga taxi samtang, pipila pa kanila mobalibad o magpili og destinasyon sa pasahero labi na panahon sa rush hours. Dunay pipila pa ka taxi nga dili na maayo og kondisyon ug ubang drayber nga dili matinahuron o walay delikadisa sama sa moubo bisan sirado kaayo ang taxi.

Gawas sa isyu sa dakong bayranan, daghang mopili sa Uber ug Grab cars tungod sa mga bag-ong unit, humot, matinahuron ug desente ang mga drayber diin babaye ang uban. Kabahin kini sa kultura sa pagserbisyo nga ilang gipatigbabaw. Busa, dili kita makabasol sa uban nga mopili kanila bisan mahal kini.

Apan, ang LFTRB naggukod sa mga drayber sa Uber ug Grab. Nakasabot kita nga ang LTFRB maoy tig- regulate sa transportasyon sa yuta. Ang nahisgotang mga kompaniya dunay mga dokumento kuwang sa ilang operasyon. Apan ngano nga ang drayber, kasagaran nanag-iya sa ilang gimaneho nga unit, maoy pahimungtan? Pahamtangan og dakong multa. Naningkamot lang sila nga manginabuhi. Kon sayop kini, ang angay gukdon sa LTFRB mao ang Uber ug Grab, sirad-an o i- padlock ang ilang buhatan. Ilegal ba sila o wa lang kahay maayong cashabotan?

Ug nasayod kita nga ang LTFRB 7 "simhot-sampot" sa mando gikan sa ilang ulohang buhatan. Atong hagit kanila nga mohimo og aksiyon nga may kasingkasing. Di kawatan o kurakot ang gigukod, nanginabuhi sa matarong.