Ang apan ni Konsehal Guardo

Dili na nato ikahibulong ang pagbiya ni Konsehal Jerry Guardo sa Team Rama ug mitabok na ngado sa Bando Osmeña Pondo Kauswagan (BOPK) ni Cebu City Mayor Tomas Osmeña.

Kaniadto pa man gud gidungog ang balita kabahin sa paglayat ni Guardo kay ang igsuon niini nga si Atan Guardo naa man sa kampo ni Tomas.

Pero, ang nakangil-ad kay nagsigi'g balikbalik si Jerry nga di mahitabo ang pagbalhin kay nag pabilin ang loyalty konuhay niini sa pulitika.

Gani ning bag-o lang, gipamahayag ni Guardo, may labot sa isyu sa pagka suspenso sud sa tulo ka buwan ug iyang gipasanginlan ang kaalyado sa pulitika nga si Kapitan Lemar Alcover, anak ni Konsehal. Jun Alcover, ang nanghingusog sa pagka suspenso niini.

Subling gipahayag gihapon ni Guardo magpabilin gihapon siya sa Team Rama kay nagpabilin ang iyang loyalty.

Wa na lang unta gibalik gibalik ni Jerry ang termino nga loyal ug magpabilin sa Team Rama aron di kini mahimong kataw-anan.

Kon hugawhugawan sa pagsabot sa iyang kaatbang sa pulitika mahimong mosamot kabati ilabi iapil ang personal nga isyu.

Para nako, normal sa pulitiko sa ilang pamulitika ang paglayat sa bisan asa nga par- tido. Kana bitaw nga mga napili na sa ilang katungdanan ang nagtungkawo ang mga sakop ra sa ilang pamilya sa pag trabaho sa ilang opisina.

Kinsa man sab ang di ganahan nga mobali sa kampo sa mayor, naa man ang daghang grasya. Gawas nga itudlo pa gayud sa pagka deputy mayor.

Laktud pagka sulti si Osmeña ang labing gamhanan dinhi sa siyudad ug di na ang Team Rama nga gipangulohan ni kanhi Cebu City Mayor Mike Rama.

Ilabi pa nga gasigi ug balik balik si Presidente Rodrigo Duterte, sa pangan ni Rama nga nalambigit sa pag protihir sa nag negusyo ug shabu. Ang nahitabo misamot kaguba ang pangan ni Mike.

Kini unta nga punto maoy gamiton nga rason ni Guardo sa pagbali kay anaa ang pabor ni Tomas ug maglisud na sa pagbarog si Rama.

Kombensido ko wa mo gamit ug di protector si Mike. Biktima lang ang kanhi Mayor sa hunghong sa mga tawo nga nagpalibot sa presidente.

Ang pangutana, kinsa ning tawhana?

Di ba kaha si Bong Go, ang suod ni Peter Lim, ang giingong labing dakong drug lord sa Pilipinas.?

Mao ni sutaon ni Rama kinsa ning tawhana kay gasigi balikbalik si Digong og pangan niya. (efren_lonzon@yahoo. com / 09427930111 )