Mga Sumalinog mipatigbabaw sa Baroto Regatta

Hapsay na sab ang pagbugsay sa magsuong sila si Lyndon ug Ricardo Sumalinog aron angkunon ang ikatulo nilang sunodsunod nga titulo sa ‘Balik Baroto Regatta’, usa ka talagsaong lumba sa dagat nga tipik sa ika-72 nga anibersaryo sa makasaysayong Talisay Landing niadtong Dominggo sa Barangay Poblacion, Talisay City.

Ubos sa naglagiting nga kainit, ang mga Sumalinog sa barangay Tangke mihuman sa lumba sulod sa usa ka oras, 50 ka mga minutos ug 48 ka mga segundos.

Ang lumba, nga gipasiugdahan sa Balik Baroto Movement pinangulohan sa ilang founding chairman Dir. David ‘Kuya Boy’ S. Odilao, Jr., mihatag og P50,000 nga ganti sa mga Sumalinog isip kampiyon.

Ang mga Sumalinog wala pa sukad nakatilaw og pilde sa mga lumba nga ilang gisalmutan sama na lang sa Tuburan, Araw ng Kagitingan ug Sinulog Regatta.

Pulos sab mga taga Talisay City ang nakaangkon sa ikaduha ngadto sa ikalimang dapit. Kini mao sila si Gilberto Obrero ug Frankie Gamboa (1:52:04), Mario Canon ug Arnold Cabalda (1:52:06), Virgilio Jumao-as ug Marto Abines (1:54:23) ug sila si Limdel ug Jimmy Malinao (1:58:40).

Dul-an sa 100 ka mga mananagat gikan sa Cebu, Bohol, Leyte, ug Lanao del Norte ang ningsalmot sa lumba.