Coach Chot nagpasalamat
Mapasalamaton si Gilas Pilipinas national coach Chot Reyes nga giusab sa Philippine Basketball Association (PBA) ang format niini alang sa All-Star Week.
Sa bag-ong format, makabenepisyo ang Gilas Pilipinas gumikan kay magsilbe kini nilang tune-up games alang sa ilang kampanya sa umaabot nga 2017 Southeast Asia Basketball Association (SEABA) Championships.
Ang PBA nagporma og tulo ka teams nga magrepresentar sa Luzon, Visayas ug Mindanao nga makigbatok sa mga sakop sa Gilas Pilipinas national training pool.
“I’m looking forward to it, because that’s basically our only tune-up as a team before SEABA,” matod ni Reyes sa interbyu sa Spin.ph.
“We’re not going to be able to have any chance, and even then, it’s not going to be perfect because we’re not going to have the complete, full 12-man team playing together.”
Ang mga magduduwa sa Gilas nga gikan sa Luzon, Visayas, ug Mindanao moduwa sa ilang “home team” batok sa national team.
Nagpasabot kini nga si San Miguel Beermen center JuneMar Fajardo, kinsa lumad nga taga Sugbo, moduwa sa Visayas squad nga moparang sa Gilas national squad karong Abril 30 dinhi sa Sugbo.
Sila si Jayson Castro ug Calvin Abueva moduwa sa Luzon team nga makigbatok sa national aquad karong Abril 28 sa Lucena City.
Samtang si Mac Belo moduwa sa Mindanao team nga mokontra sa national squad karong Abril 26 sa Cagayan de Oro City.
Ang nangahisgutang mga sakop sa national team moduwa sa Gilas batok sa team nga dili ilang gigikanan.
Si habig ni Fajardo, moduwa kini sa GIlas kon ang kontra niini mao ang Mindanao ug Luzon teams.
“That’s better than nothing,” asoy ni Reyes. “We’re not going to have a chance to practice or play anymore until SEABA, so I thought it was good to take advantage of that opportunity. I thank the PBA for affording us the chance.”
Ang SEABA Championships gikatakda karong Mayo 12-18 sa Manila.