2 KA BABAYE GIPATAY
SKATEBOARDER NGA TAGA LAPU-LAPU NANUNGGAB SA SIQUIJOR
Duha ka mga babaye, usa mabdos samtang ang usa menor, gidunggab patay sa usa ka lalakeng gituohang hubog ug high sa illegal drugs niadtong Dominggo sa gabii. Nabulabog ang mga nangapil sa usa ka long board
international competition sa hitabo sud sa The Bruce Resort sa Barangay Solangon, lungsud sa San Juan, Probinsiya sa Siquijor.
Sila Nikki Pinero, 21, dalaga taga Dumaguete City, mabdos, ingon man si Loreen Ramirez, 17, taga Makati City, pulos
dead-on-arrival (DOA) sa Siquijor Provincial Hospital.
Nasikop si Michael Malayo, 34, minyo, taga dakbayan sa Lapu-Lapu, giingong hubog ug sabog sa ginadiling drugas.
Si Malayo nakuhaag mga dahon sa marijuana, ingon man unom ka kutsilyo nga nagkadugo sud sa iyang backpack.
Ang mga biktima, ingon man si Malayo gikatahong kaila kay pulos sila nalakip sa international skateboarding competition sa maong dapit sugod niadtong Biyernes.
Si Sr. Supt. Erson Digal, director sa Siquijor Provincial Police Office (SPPO) nga nahinabi sa Superbalita Cebu nagkanayon nga nabulabog ang kamalinawon sa lugar human nakadawat og tawag sa selpon kabahin sa usa adik nga nangatake sa resort nga nakapatay sa duha ka babaye.
Sa hot pursuit operation, ilang nadakpan si Malayo, diin nakuha gikan sa iyang possession ang unom ka kutsilyo nga pulos nakadugo ingon man ang daghang marijuana nga gisulod sa cellophane.
Si Digal nibutyag nga si Malayo nitug-an kanila nga iyang gipatay ang mga biktima human siya nahadlok nga itug-an sa pulis nga naghithit og marijuana.
Si Malayo nipadayag nga ang uyab ni Nikki maoy iyaha untang tuyo nga patyon human kini maoy mihulga kaniya nga isumbong sa pulis dihang nakit-ang naghithit sa marijuana.
Nikuha siyag kutsilyo ug gidiretsog luba si Ramirez.
Dihang nakakita si Pinero, dali unta kining mitabang mao nga iya usab nga gidunggab hinungdan sa kamatayon.
‘Giplano na gyud niya daan kay sigon sa usa testigos didto sa resort nga nakit-an nila ang suspek nga nagtuyoktuyok sa maong lugar sa wala pa ang krimen,” dugang ni Digal.
Si Malayo nga giingong sabog kaayo dihang nadakpan, nipadayag nga naglagot siya sa uyab ni Nikki kay nabalaka siyang itug-an sa pulis kabahin sa paghithit sa marijuana.
Apan si Digal nipasabot nga posibling dunay karaang panagbangi ang mga biktima ug si Malayo hinungdan nga gihimo niini ang krimen.
Gipasabot ni Digal nga kaila ra ang tulo ug dako ang posibilidad nga pasangil lang ni Malayo nga nahadlok siya nga itug-an sa pulis sa uyab ni Pinero.
Sumala pa ni Digal nga sila si Pinero ug Ramirez nakaangkon og daghang samad dinunggaban sa kalawasan samtang nagtuo sila nga ang unom ka mga kutsilyo maoy gigamit ni Malayo.
Gipatawag nila ang nag-ganisar sa maong international competition sanglit wa kini mag- request og presensiya sa kapulisan.
Nakig-alayon ang kapulisan sa Siquijor sa kapulisan sa Cordova alang sa pagkuhag dugang background ni Malayo. Si Digal nipadayag nga isolated ang maong krimen ug wa makabalda sa kahapasay ug kalinaw sa ilang probinsiya.
Gitug-an niini nga si Gobernador Zalde Villa nipadangat sa pahasubo sa mga pamilya sa mga biktima. /