Daghang dapit sa Mandaue gibahaan; agianan sa tubig ibalhin sa DPWH

Nunot sa kusog nga pagbunok sa kusog nga uwan kagahapon sa buntag, pipila ka mga dapit sa dakbayan sa Mandaue gibahaan.

Tungod sa baha nga nasinati sa upat ka mga dapit, niresulta sab kini sa grabeng kahuot sa trapiko sa nagkadaiyang dalan nga nilungtad kagahapon sa udto.

Matod ni City Disaster Risk Reduction and Management Office (CDRRMO) head Felix Suico nga naigo sa kusog nga baha ang Brgy. Looc, Tipolo, Banilad ug dalan DM Cortes corner A Soriano sa dakbayan kagahapon sa buntag.

Sa Brgy. Looc, nasinati ang taga tuhod nga baha tungod sa baradong drainage system nga ni- overflow sa dapit.

Matod ni Suico ning mantalaan nga ang Department Of Public Works and Highways (DPWH) kasamtangang nagtrabaho sa paghimo og u-turn slot ilawom sa unang taytayan duol sa dapit.

Tungod sab aha, ang kagamhanan sa dakbayan nitawag sa DPWH kabahin sa maong problema ug ang ahensya niingon nga ibalhin nila ang agasan sa tubig aron di na bahaon ang dapit, butyag ni Suico.

Sa susamang barangay, wa usab makalingkawas sa baha ang balay ni Konsehal Kevin Cabahug susama sa ubang mga residente nga gibaha.

Sa Tipolo, nasinati ang kusog nga pagbaha sa may Landbank, ug didto sab sa may LH Prime sa dalan AS Fortuna, Brgy. Banilad ang nakasinati og pagtaas sa tubig.

Sigun ni Suico nga nihunob ang baha ug nakaagi na sa mga dalan ang mga sakyanan pasado alas 8 sa buntag na, apan ang kahuot sa trapiko nilungtad hangtod alas 12 sa udto.

Ang baha naandan na nga suliran sa mga dapit sa Mandaue City kay ubos ang level niini.

Sa mga social media posts kagahapon, bisan sa hapon nasinati gihapon sa mga sumasakay ug motorista ang pagkabara sa trapiko.