Seguridad para Semana Santa

Andam na ang kapulisan sa lalawigan sa Sugbo sa paghatag og igong seguridad alang sa pag-obserbar sa Semana Santa.

Dugang sa Cebu Police Provincial Police Office (CPPO), ipakatap sa isla sa Bantayan nunot sa kasaulogan sa kapistahan sa maong dapit nga dugokan sa mga langyaw ug lokal nga turista.

Usa sa gipatutukan sa hepe sa CPPO ang isla sa Bantayan human daghang langyaw nga turista gikan sa nagkalainlaing suok sa kalibutan.

Tungod niini, modugang og 50 ka police personnel gikan sa CPPO aron moabag sa mga pulis sa isla wala pay labot niini ang team sa Theft and Robbery Section (TRS) fikan sa Cebu City Police Office (CCPO).

Lakip sa ilang patutukan ang lungsod sa Minglanilla tungod sa ilang reliheyusong kalihukan sa mianang Dominggo sa pagkabanhaw.

Si Major Gerard Pelare, hepe sa operation branch sa CPPO nga ilang gituohan nga daghan ang mosaksi sa sugat sa Minglanilla nga angayan nga dugangan ang ilang pwersa gikan sa Public Safety Company (PSC).

Mimando si Sr. Supt. Eric Noble sa mga pulis nga madestino sa isla sa Bantayan nga ipatuman ang unsa man ang naa sa Provincial Ordinance sama sa pagdili sa mga law-ay nga pasundayag.

Dili usab magpaapekto sa kasungian karon sa simbahan ug sa kagamhanan sa lungsod sa Santa Fe ug angayan nga nakatutok sila sa pagpatuman sa kahusay ug kalinaw.

“Kung ano man ang batas ang role lang ng police ay mag implement, we assist them and we make sure na dapat orderly at peaceful yung conduct duon,” pasabot ni Sr. Supt. Eric Noble.

Bisan gi- deploy sa CPPO ang kapin sa walo ka gatos ka mga pulis alang sa pagbantay sa Association of Southeast ASian Nations (ASEAN) Summit sa dakbayan sa Lapu-Lapu, hugot usab nga seguridad ang ilang gipatuman sa lungsod sa Oslob nunot sa posibling pagbisita sa mga delegado.

Wala pa hinuon makadawat ug komunikasyon ang buhatan ni Col. Noble sa ASEAN

organizers apan nangandam na silang daan kung ugaling makahukom sila nga mobisita sa maong lungsod sa habagatan sa lalawigan. / AYB