Lalake naglakaw uban sa higala gipusil, patay; biktima giingong drug user: pulis

Namatay ang usa ka lalake human siya gipusil sa wa mailhing mamumuno samtang naglakaw kuyog sa iyang higala sa sityo Luna, Barangay Lagtang, dakbayan sa Talisay niadtong Dominggo sa gabii.

Sigun sa report sa Talisay City Police Station, ang namatay giila nga si Aljun Labrador, 28, ulitawo, taga sitio Cadikay, Barangay Lawaan 2.

Matod ni SPO2 Yvonne Ilustrisimo sa Talisay City Police Station nga base sa ilang imbestigasyon, si Labrador naglakaw kuyog sa iyang higala.

Sa dihang kalit lang gipusil sa wa mailhing mamumuno.

Naigo sa iyang buko-buko ingon man liog si Labrador hinungdan sa iyang pagkahagba.

Dali siyang gidala sa mga tawo sa Talisay City District Hospital, apan gideklarar nga patay nang midangat sa tambalanan.

Nakuha gikan sa crime scene ang usa ka slug ug deformed slug sa .38 kalibre nga armas.

Si Ilustrisimo niingon nga maayong tawo si Labrador apan nakakuha silag report nga giingong mogamit sab kinig illegal nga drugas.

Sigon pa niya nga sa wa pa mahitabo ang pagpamusil, aduna’y nakalalis si Labrador.

Ila pang gitino kon kinsa ang mao nga tawo ug unsay gilalisan sa duha.

Wa isalikway sa kapulisan ang posibilidad nga may kalambigitan kini sa kamatayon ni Labrador.

Ang kapulisan sa Talisay padayon pa sa ilang imbestigasyon aron matino ang motibo.