BISAN SA MGA KAPAKYASAN
Ang matag kalampusan sa kinabuhi kanunay gikaluhaan og mga pagsuway.
Kini ang nahitabo sa kinabuhi ni Edgar Lim, 50, taga Barangay Kamputhaw, Cebu City. Iyang nasulayan ang kaharohay sa pagpuyo, gihuros sa unos sa dautang kapalaran apan wa magpatay-og ug padayon nga nanlimbasog.
Gipakatawo si Edgar sa magtiayon nga Insik gikan sa Tsina ug nieskwela sa Sacred Heart School gikan sa kindergarten hangtod siya nilampos sa high school nga hinatagan sa ginikanan sa iyang gusto.
Dihang nitungha na si Limsa University of San Jose Recoletos sa kursong Commerce, iyang gikatagbo si Viola Gillera nga iyang schoolmate.
Third year ra kutob si Edgar sanglit iyang giminyuan si Viola niadtong 1985, kinsa wala usab makatapos sa college.
NEGUSYO
Kay lagi Insik, ilang prayoridad ang negusyo ug bisan wa sila makahuman sa pagtuon, nangindahay nga makabaton og hayahay nga kinabuhi nga wala magsalig sa ilang mga ginikanan.
Iyang gisugdan ang paghimo og sapatos diin ang iyang mga trabahante gikan sa dakbayan sa Carcar.
Nilahutay ang iyang patigayon sulod sa pipila ka tuig ug nidako ang iyang kita.
Apan niadtong 1990, ang mga produkto gikan sa Tsina nga barato kon itandi sa local, nihinayhinay na og sulod sa merkado sa Sugbo. Dinhi nag-anam og hinay hangtod nga naluka ang negusyo ni Edgar nga sapatos nga gibuhi sa tulo ka mga anak.
Human niadto, nisuway na usab siya og franchise sa usa ka kompaniya sa ice cream.
Nilahutay kini sulod sa pipila ka tuig apan pagsulbong na usab sa ubang produkto ug ngalan sa laing ice cream, nihinay na usab ang iyang negusyo.
PROBLEMA
Nag-abot ang problema sa pamilyang Lim dihang pulos nagtungha sa kolehiyo ang iyang mga anak diin si Erick John usa na karon ka registered nurse, Ervin Dwayne gradwado sa culinary arts ug bag-ohay lang nilampos sa kolehiyo si Ervin Dwayne sa kursong Tourism. Dihang nagtungha pa ang iyang duha ka mga anak, nadiindiin na sila og pangita og kwarta para ibayad sa matrikula sanglit natumong usab kadto nga nabangkarota ang ilang negusyo sa ice cream. Giasoy ni Viola nga naluoy sila sa iyang mga anak sanglit gawas nga naninguha sa pagtuon, naningkamot usab para makakita og kwarta para sa ilang allowance pinaagi sa pagpasuhol sa construction kon adunay classmate nga magtukod og balay.
PAGBANGON
Karon nga nahuman na sa pagtuon ang ilang mga anak, ang pamilyang Lim nibalik og sulod sa negusyo ug nagtukod og usa ka buffet restaurant sa General Maxilom Avenue duol sa USC Boys High nga ginganlan og “Chik Chow” pinaagi sa ayuda ni Vicente Veloso nga iyang higala nga taga Leyte.
Ang buffet restaurant adunay 18 ka potahe gikan sa dessert, drinks ug mga sud-an diin ang ilang specialty mao ang roast pork, lengua estofado, all meat dugodugo, Chinese lumpia ug mga seafood sa presyo nga barato kaayo.
Mangunay siya sa pagluto, kansang estilo iyang nasunod gikan sa ilang yaya apan mas gipalami pa niya. /