Ang turismo ug simbahan
Mitumaw ang conflict o kasungian tali ni Sta. Fe, Bantayan Island Mayor Jose Esgana ug ang kura paruko sa Santo Nino Parish sa maong lungsod, Fr. Roy Bucag, gumikan sa kutay sa mga kalihukan nga gipasiugdan sa usa ka private organizer atol sa Semana Santa. Giprotestahan sa pari uban sa pipila ka mga parokyano ang maong mga kalihukan kay "disrespectful" kini sa simbahan. Ang kutay sa mga kalihukan nga gitawag og "Music Festival" adunay pagtugot sa lokal nga kagamhanan aron usab maka-agni og mga turista nga adto mobakasyon sa semana santa. Ang Bantayan Island nga naglangkob sa mga lungsod sa Bantayan, Sta. Fe ug Madridejos maoy sagad bisitahon sa mga turistang lokal og mga langyaw panahon sa Semana Santa gumikan sa maanindot nga mga beaches niini. Ang Bantayan island maoy usa sa tourist destinations sa Sugbo.
Ang mga kalihukan nga gihan-ay sa organizer mao ang film showing kabahin sa Passion of Christ sa Good Friday, acoustic songs sa Black Saturday ug disco sa Easter Sunday. Walay bikini open, dili sama kaniadto nga dihay mga artista nga miapil sa bikini open. Ang mga opisyal sa lungsod misakmit lang usab niining maong oportunidad nga ma- promote ang tourism sa ilang lungsod gumikan lagi kay daghan man ang mga turista. Unya dako man og makita nga revenue ang lungsod ug daghan usab sa mga lumolupyo ang makakita og kapanginabuhian.
Kon mao lang kini ang kutay sa mga kalihukan, para nako, morag okey ra man ni siguro. Dili man law-ay ang maong mga kalihukan. Sa Easter Sunday okey ra man nang disco kay angayan man kitang maghudyaka kay "nabanhaw" man si Kristo niana. Nakalitan lang siguro si Fr. Bucag kay mao pay iyang pagkadestino sa lungsod nga adunay mga kalihukan ug tradisyon sukwahi sa pagtuo sa simbahan.
Usa sa mga tradisyon sa mga Bantayanon mao ang pagkaon og karne panahon sa Semana Santa. Ang mga Katoliko sa ubang mga lugar, dili mokaon og karne niining mga adlawa. Pero ang taga Bantayan habhab gyud ug lechon. Apan kining maong tradisyon adunay dispensation o pagtugot sa Santo Papa mismo. Busa dili makapakgang ang taga simbahan niini.