Respeto sa Semana Santa

Di nato ikalalis nga ang lungsod sa Sta. Fe, isla sa Bantayan, maoy usa sa mga inilang dapit sa amihanang bahin sa Sugbo nga maoy hugopanan sa mga local ug international nga mga turista.

Kini tungod sa ilang hapsay ug maanindot nga baybayon nga gidayandayanan sa mga puti nga mga balas ug maabi-abihon nga mga bawod sa kadagatan.

Haom ang maong lugar alang niadtong mga tawo nga gustong mobakasyon samtang magpahulay gikan sa subsub ug masako nga gimbuhaton.

Mao nga sa matag Semana Santa diin adunay hataas nga bakasyon, mohan-ok ang mga turista sa maong lungsod aron pagtagamtam sa maanindot nga palibot. Adunay pipila nga magdala sa ilang mga pamilya ug aduna usay adto moabi-abi sa ilang mga bisita.

Sa laktod nga pagkasulti, ang Sta. Fe ning maong mga adlaw dasokan sa mga turista kinsa, sa samang higayon, gusto usab mopalabay sa panahon ug moduyog sa paghandom ning balaan nga Semana Santa.

Pero ning uwahi lang, gihamok sa kontrobersiya ang nahisgutang lungsod tungod niining pagpasiugda og usa ka Isla Music Festival nga giatol sa adlawng Sabado sa Semana Santa.

Samtang kini hugot nga gisupak sa relihiyusong sektor, ang mga nagpasiugda nga gipangulohan sa usa ka Farrah Sanchez nakakuha og igong suporta gikan ni Sta. Fe Mayor Jose Esgana. Ilang rason? Pagpalambo sa tourism industry sa maong lungsod. Kini maoy lisod tuohan kay kaniadto pa man ning gidagsa sa mga turista ang Sta. Fe ilabi na ning mga adlawa.

Di nato masalikway ang mga pagduda nga posibling misakay lang ang mga organizers alang sa kaugalingong interest.

Hinaot nga hinuklogan unta og maayo ni Esgana ug sa organizer ang kabalaan ug ang pagrespeto sa paghandom sa Semana Santa sa ngalan sa atong Labawng Makagagahum.