Legal ang P35?

Miinsister nga nagtuman lang sa balaod ang BDO Unibank Osmeña dihang nideklarar kini nga ang ilang gross income sa miaging 2015 moabot lang og P6 mil kapin busa legal lang nga nibayad sila og P35.

Usa ka sanga sa labing dakong bangko sa nasud nibayad lang og P35. Mas dako pa ang bayad sa mga sidewalk vendors nga P10 nga arkabala kada adlaw.

Dayon ang mayor nga mopasirado sa bangko kay alang kaniya dili kini makiangayon, tawgon na hinuon nga bully.

Makapahimuot kay ang mga tigdepensa sa BDO dili mohisgot nga nibayad lang kini og P35 sa 2015. Igo lang moingon nga legal ang maong pagbayad. Legal diay nga mobayad og business tax nga P35 ang usa ka sanga sa labing dakong bangko sa Pilipinas?

Dunay moingon nga dili kini katuohan bisan pa og wala kini gi- deny sa bangko. Igo lang sila moingon nga legal kini.

Kon legal man gani, naa diay kitay balaod nga mopabayad lang og business tax sa usa ka sanga sa labing dakong bangko sa Pilipinas nga P35 samtang ubang mga gagmayng negusyante nagpas-an og mahal nga mga bayranan.

Alang kanako, yabag sab kining argumento nga daghan man ang naglapas sa balaod, nganong ang BDO lang ang gitutokan.

Mohagit lang ko niining mga mogamit sa maong argumento kon unsa man kining mga bangkoha nga giingong mga tax evader. Ato sab nga i- expose. Nganong igo man lang modepensa sa mobayad lang og P35 sa usa ka tuig?

ALVAREZ

Nagtuo na tingale si House Speaker Bebot Alvarez nga madawat na sa publiko ug sa mata sa balaod ang pagpangabit tungod kay, sa iyang pulong pa, kinsa man ang walay girlfriend?

Nagtan-aw ko sa television sa iyang nawong dihang gisulti kini, daw mapasigarbuhon pa kini nga naa siyay uyab.

Tuod man, niresulta kini sa lain-laing mga pagsaway gikan sa mga Netizens, mga peminista labi na ang Gabriela, ug iyang mga kaatbang sa politika.

Kon tinud-on nga dunay mokiha kang Alvarez, magtagilid ra siya. Duna may daghang nahukman na ug nabalhog sa prisohan tungod sa immorality.

Samtang, tinuod man kuno kining giingong nga mga lihok aron mapailisdan kini isip Speaker.

TRES DE ABRIL

Ato diayng gihandom kagahapon ang pag-alsa sa mga Sugboanon batok sa mga Katsila sa panahon ni Mampor.

Gipangulohan ni Leon Kilat, nakab-ot nato ang usa ka temporaryong kadaugan apan human sa pipila ka semana, niabot ang reinforcement ug napugos sa pag-atras ang mga Sugboanon.

Ang nakapait lang kay dihang niatras ug nitago si Leon Kilat sa lungsod sa Carcar, giunay man hinuon siya sa mga lider sa lungsod.

Maayo na lang kay gipadayon ni Heneral Arcadio Maxilom ang pakigbisog ug human sa pipila ka bulan, napalagpot gikan sa Sugbo ang mga Katsila.