Model City

Gubot. Ang isla sa Bantayan, Cebu maoy suroyanan sa katawhan gikan sa nagkalain-lain dapit sa panahon sa Summer. Atol sa Summer mao usab ang pagsaulog sa mga Katoliko sa Semana Santa kon Holy Week.

Dugay na nga panahon nga ang Isla sa Bantayan, nga nagsakop sa lungsod sa Sta. Fe, naila sa tibuok nasud ug sa gawas nga mao ang sentro sa selebrasyon sa Semana Santa nga morag pista ang selebrasyon kay wa gidili ang pagkaon sa karne.

Matud pa sa estorya ang rason nga gitugtan ang pagpatay og baboy ug kaon sa karne ning semanaha tungod kay walay mangingisda atol sa Semana Santa. Ang numero uno nga pangita sa taga isla sa Bantayan mao ang pangisda.

Apan sa di pa ta magsaulog sa Semana Santa na sentro na ang Sta. Fe sa kontrobersiya tungod kay ang kora paruko sa Sta. Fe nagprayer-rally agi og pagbabag sa ipahigayon nga Isla Music Festival sa Sabado Igloria.

Matod pa ni Sta. Fe Mayor Titing Esgana, nga gikahinabi sa “Frankahay Ta” (dyCM 1152AM) gahapon sa buntag, nga ang prayer-rally way permiso gikan sa lungsod unya naggamit pa gyud og mga bata nga maoy nagdala sa streamer.

Sa panahon ni kanhi gobernador Gwen Garcia, iyang gipaundang ug gipasakaan og kaso ang mga nagpasiugda og bikini open sa usa ka beach resort sa Isla sa Bantayan atol sa Semana Santa.

Kon ang ipahigayon usa ka Music Festival unya ang tokada adto sa dapit o beach nga halayo sa Simbahan Katoliko, sa ato pa di makasamok sa kalihokan sa simbahan. Ang music festival di man law-ay sama sa bikini open.

Ambot unsay tinuoray nga rason ni Padre Roy Bucag nga mibabag man siya sa ipahigayon nga Isla Music Festival nga, matod pa, di man kini makadisturbo sa selebrasyon sa Semana Santa kay sa Sabado pa ipahigayon ug adto sa gawas sa lungsod.

Matod pa ni Mayor Esgana, way labot ang lungsod sa maong music festival. Ang pangutana karon, tugtan ba sa lungsod sa Sta. Fe ang Isla Music Festival bisan dunay pagbabag si Padre Bucag?

Model City. Matud pa sa taho, ang dakbayan sa Sugbo napili nga usa sa mga modelo nga dakbayan sa Association of Southeast Asian Nations (Asean) nga giingon nga “environmentally sustainable cities program.”

Apan sa akong paglabay sa Barangay Luz gikan sa akong pagdulhog sa “flyover”, ang misugat sa akong mga mata sa akong paglingi sa walang dapit mao ang nagtipundok nga basura sa kilid sa dalan.

Matod pa ni kanhi konsehal Nida Cabrera, nga karon consultant sa City Hall, ang dakbayan mao ang nag-una nga local government unit nga misagop sa special waste management policy nga iyang gipasiugdahan sa konsehal pa siya.

Maayo unta nga tungod ani nga pasidungog molihok gyud ang atong mga basurero sa paghakot ug limpyo sa basura.