Di gyud matag-an ang kinabuhi
Usa ko sa nakalitan ug nahugno pagkadawat nako sa text message nga wala na ang among higala ug musikero nga si Sherwin Enanoria.
Namatay si Sherwin sa edad nga 55 nga gituohang giatake sa kasingkasing samtang nahinanok niadtong Huwebes, Marso 30.
Matod sa iyang igsuong si Lemuel nga gipugos og abli sa ilang katabang ang lawak ni Sherwin kay bisan giunsa nila og sampit dili kuno motubag. Ug maoy nisugat sa ilang panan-aw nga naa ni sa sawog ug bugnaw na.
“Wala man to siyay sakit. Kalit lagi kaayo,” tug-an ni Lemuel nga usa sad ka gitarista.
Hasta ang mga tinun-an ni Sherwin sa A. Salonga Music Centre, diin siya nag-alagad isip piano teacher, nakalitan ug naghinilakay.
Daghan ang natandog tungod sa kamaayong tawo ug ka-dedicated niya sa iyang trabaho. Dugay siyang nagbase sa abroad hinungdan nga wala nako kabalita niya.
Nagkita mi og balik 2015 na. Nagsige ra mi og pangatawa sa mga kabuang ug halandumong kasinatian namo niadto.
THROWBACK
Nag-eskwela pa lang mi sa University of San Jose Recoletos, si Sherwin na ang gitarista sa choir sa chapel sa USJ-R hangtod nga nigradwar mi.
Ang chapel niadto tupad pa sa office sa Dramatics Guild nga giduma niadto ni anhing Radi Ruiz. Ambot kaha karon unsa nay dagway sa among beloved alma mater.
Pag-gradwar namo sa kolehiyo, nagkauban mi ni Sherwin sa Mellifluous band nga nagtukaran sa kanhi Gaw Central Square, diin ang among drummer pa ato si Rey Datan nga No. 1 drummer niadto sa Sugbo.
Nagkauban sad mi ni Sherwin sa XTRMZ band, kaming Fe Maningo, Cabase brothers, Alex Alcos ug uban pa. Regular gig namo ang mga kanhi Cebu Plaza Hotel ug Magellan Hotel.
Sa profile picture ni Sherwin sa Facebook, makita ang picture nila ni Sheryn Regis sanglit dugay sad ni silang nagkatrabaho sa una.
LUBONG
Si Sherwin gihaya karon sa Saint Peter Memorial Chapel sa Imus ug ibalhin karong Huwebes sa gabii, Abril 6 hangtod Abril 9 sa San Nicholas chapel.
Ang lubong sa Abril 9 sa Mactan Island Memorial Garden sa LapuLapu human sa 1 p.m. requiem mass sa San Nicolas.
Nag-estorya pa gani mi niadtong December kauban si Manny Canizares, ang in-house pianist sa SM Northwing, kay plano nilang magtukod og acoustic band.
Kinsay magtuo nga katapusan na diay to namong estorya.