See you in my heart
Nahibulong gyud ko. Unya, mitan-aw og dugay si Randy nako. Nakahuman na ko sa pagbasa sa mga pulong sa Diyos ug mibiya na sa pulpito o ambo. Nagpanglingi ko kang Randy samtang mibalik kog lingkod duol sa altar. Gisundan ko niyag tan-aw. Mipahiyom siya nako. Nakapahiyom sab ko niya.
Duna koy namatikdan kang Randy. May sakit kaha siya? Midaot man gud siya.
Pagkahuman sa Misa, ug nakahubo na ko sa akong gisul-ob para sa pagka lector, migawas na ko sa simbahan. Gusto kong maglikay kang Randy. Apan naghuwat diay siya nako. Wa na koy nahimo, nakig-estorya ko niya samtang naglakaw mi. Walking
distance lang ang among balay gikan sa simbahan.
“Milagro man nga nanimba sa akong gialagaran, Ran.
First time nimo ni, no?” “Oo, Sha. Usually, sa Cathedral ko manimba every Sun- day. Pero gusto lang tikang makita ug ikasulti.”
Seryuso si Randy. Nahikatawa ko. Ambot ba, kusog man ang pagbutuk-butok sa akong dughan. “N-Ngano man?” “Friend man ta, di ba? Unya kumare pa gyud ka nako.”
Nahikatawa kog kusog. Tuod, kumpare man diay nako si Randy kay parehas ming nangugos sa bunyag sa usa lang ka bata.
“Way angay nga duna na tay kumare ug kumpare, no, Sha?” Mikatawa na si Rndy. “Bitaw, uy! Mga batan-on pa ta. Pero ingon man gyud ani ba. Di man mokuhag tiguwang ang mga ginikanan nga mangugos sa bunyag sa ilang anak. Gusto nilang mga batan-on kay inig dako sa bata, mahamtong lang ang mga Ninang ug Ninong. Di pa gyud matiguwang. Kita gung mga Ninong ug Ninang sa bunyag maoy ikaduhang mga ginikanan sa bata.” “May rason ka sab ana, Sha.” Nahilom ko. Nahilom sab si Randy. Usahay magkatinan-away mi ug magpahiyomay. Nagkaduol na mi sa among balay.
“Kining kuan, Sha. Tinuod ba ang giingon ni Carol nga mosu’od ka pagka madre?”
Nakahunong ko paglakaw. Mitan-aw ko pag-ayo kang Randy. Miseryuso na sab siya.
“O-Oo, Ran. Nagkita diay mo si Carol?”
“Sulagma lang ang among panagkita kagahapon, Sha. Nagkadungan mig su’od sa usa ka Mall.”
Nahilom na sab ko. Mipadayon ko paglakaw. Unya gipangutana ko si Randy bahin nila ni Sandra. Mitan-aw siyag dugay nako. (SUMPAYAN)