TAMBAGI KO, NOY KULAS

Wa makapasaylo

Dear Noy Kulas,

Tawga ra ko og Delfin. Hingkod na ko, apan sama ra gihapon sa usa ka bata. Nagdako ko uban sa akong inahan nga way amahan. In short, inatay si Nanay. Kayod kaayo ang akong inahan aron mabuhi ko niya. Ako nagkugi og tabang aron ko makalampos ug makahaw-as mi sa kalisod.

Nagbunga, Noy, ang paningkamot namo ni Mama kay nakalampos ko sa pagtung- ha ug maayo na og trabaho karon. Sa kalit lang, niabot ang akong amahan nga wa ko makaila kay bisan si Nanay wa magtinil og picture sa iyang kahiubos nga gibiyaan mi.

Nangayo siyag pasaylo namo ni Nanay kay pila na lang ka buwan ang iyang kinabuhi. Ambot, Noy, sa among kalagot ni Nanay, wa namo siya tagda bisan pa sa iyang paghilak ug paggakos nga nangayog pasaylo namong duha. Namatay si Tatay pila ka buwan ang milabay sa pagduaw niya namo.

Taudtaud na to nga hitabo, apan wa gihapon ko makalimot, dala ang pagmahay nganong wa nako siya mapasaylo.

Noy, unsa may akong buhaton nga hangtod karon nakonsensya man ko? Nahasol ko sa pagsigeg huna-huna sa nahitabo. Di ba uwahi na? DELFIN Delfin,

Mas maanindot unta kon sa dihang buhi pa, inyo siyang gipasaylo. Tinuod, dunay mga higayon nga malumsan ta sa atong kasuko ug kasilag sa usa ka tawo. Mahitabo ni nato kay tawo ra sab kita. Apan kon kita modawat usab nga kita tawo, makasala, angay usab nga atong pasayluon ang tawo nga nakahimo nato niini.

Pasayloa ninyo ni Nanay mo ang imong amahan. Kon Katoliko ka, mahimong ipaagi mo kini sa mga pag-ampo ug pamisa, pagduaw kanunay sa iyang lubnganan. Kon unsa man ang wa mo mahatag kaniya sa dihang buhi pa siya, imo na kining nahatag bisan patay na siya. At least, mahimutang na ang iyang kalag kon asa man siya karon. NOY KULAS