DOLE-7, Solid Earth naghiusa sa Earth Day
Nauyonan sa Solid Earth Development Corp. ug sa Department of Labor and Employment (DOLE) sa Central Visayas nga mag-alayon aron maangkon ang tumong sa Earth Day nga makatanom og 7.8 bilyones ka mga kahoy sa tibuok kalibutan inig abot sa Abril 22, 2020.
Gisugdan nila'g tanom ang 5-mil ka mga kahoy pagka-Disyembre 3 uban sa Lungsod sa San Fernando sa buffer zone sa minahan nga gipadagan sa SEDC sa bukirang bahin sa Magsico, San Fernando.
Gilagdaan sab sa SEDC ug DOLE-7 ang memorandum of
agreement (MOA) sa samang adlaw nga ilang iseguro nga maalima ug mapatubo ang mga kahoy nga gitanom nila sulod sa dos ektarya nga luna.
Gitiman-an ni Exequiel R. Sarcauga, regional director sa DOLE-7, ang MOA nga motudlo og mga kawani nga maoy mobantay sa pagpadako ug suta-on kanunay ang kahimtang sa mga kahoy nga gitanom nila.
Mipasalig sab si Mitzie Almira I. Carin, deputy division manager alang sa human resources and administration (HRA) sa SEDC, pinaagi sa MOA nga panalipdan ang ilang natanom ug alimahan kini'g og maayo harun kini makatubong lig-on.
Gipasingunhan ni Konsehal Eutiquio Baricuatro ang 42 ka mga kawani sa lungsod nga miabag sa 66 ka mga sakop sa DOLE-7 sa pagpananom sa mga kahoy nga giandam sa SEDC sa nursery sa Magsico.
Labing menos 10 ka mga kawani sa SEDC, siyam sa Taiheiyo Cement Philippines, Inc. (TCPI) pinanguluhan ni Esther P. Cola, ang HRA division manager, ug 20 ka mga sakop sa kontraktor sa SEDC
nga Triple 8 Resources and Development Corp. misalmot sab sa maong pagpananom.
MALUNGTARON
Sa iyang mensahe, ang direktor sa SEDC nga si Barakki Sakakibara, tumong sa “pag-patubo, dili lang kay mananom og mga kahoy” subay sa Environmental Protection and Enhancement Program (EPEP) sa kompanya.
“Manlimbasog ta sa dugang paningkamot harun maseguro nato nga mabuhi ug modako ang atong mga gitanom kay malungtaron kini nga paagi nga mama-ayo ang epekto sa kalikopan,” siya nipahayag.
“Gilauman (nato) nga makatabang sa kalibutanong pa-
kigbisog batok sa kausaban sa klima,” dugang niya.
Mao kini uban sa pagpasabot sa hinungdan nga gisagop nila ang tema sa Earth Day nga “Trees for the Earth.”
Katuyuan sa EPEP, siya mipasabot, nga mapahibalik ug mapanalipdan ang biodiversity sa kabukiran sa San Fernando. “We want to give back to our
host community,” siya nidugang sa pagpasabot.
Nangulo a DOLE-7 atol sa pagpananom sila si Maria Nancy Z. Abad, hepe sa employment welfare, chief administrative officer Eunoco E. Arellano ug Lilia Estillore, hepe sa mga buhatan sa dakbayan sa Sugbo, Mandaue ug Lapu-Lapu.
Sa delegasyon sa probinsya ang ilang hepe nga si Maria Grace V. Diaz, uban ni Grace G. Carreon, sekretarya sa Regional Tripartite Wage and Productivity Board. (RTWPB)
Sa habig sa lungsod, diha usab sila si Eng'r. Shelley Rias, ang municipal planning and development coordinator, municipal agriculturist nga si Nelson Soronio, ang municipal accountant, ug ang luyoluyong tresurero nga si Edcel Lagoda.