Krus ni Semion
Biyernes Santo. Miuliot si Semion sa bagang duot sa katawhan nga buot mosaksi ning tinuig nga linawas nga pasundayag sa dakong hawanan atubangan sa simbahan sa lungsod sa Calape. Mabulukon ang maong kalihukan nga pinangulohan ni Padre Henry Espinosa isip halad sa tanang molupyo sa ilang lungsod aron kakuhaag pagtulon-an sa katawhan.
Daghang tawo ang gigamit sa drama nga may lainlaing papel nga gidala. Usa si Budoy, ang giilang maldito sa dapit nga midala isip Hesukristo. Nahanduraw ni Semion ang nangaging katuigan diin siya maoy gitugyanan ni Padre Henry nga modal isip Hesukristo, kay usa man siya ka lay minister nga nag-alagad sa simbahan. Lider sab siya sa Charismatic ug makighinabi sa mga sakop human sa prayer meeting. Usa niini si Lorena, pinaangkan nilang silingan dihang nagtrabaho pa kini sa dakbayan sa Sugbo isip katabang. Kasarangan lang ang kaanyag niini ug iyang nasuod kay kanunay silang magkuyog matag prayer meeting. Nahulog ang ilang pagbati sa usag-usa. Ila kining gililong sa katawhan. Sayod silang sayop kining ilang gibuhat kay dakong minyo si Semion kang Maria ug may tulo sila ka anak. Nagluib siya sa iyang asawa. Misamot ang iyang kabalaka dihang nagmabdos si Lorena tungod sa kinawat-kawat nilang kalipay. Nanglayas sila ngadto sa Mindanao kay naulaw sa hitabo. Apan wala magdugay ang ilang pagluon didto kay gibiyaan siya ni Lorena nga mikuyog sa laing lalake. Mao nga nakahukom si Semion nga mobalik sa iyang pamilya.
“Sige, latiguha pa ninyo kanang tawhana nga nangangkong anak sa Diyos!” misinggit ang usa ka tawo nga apil sa pasundayag. Nahipugwat si Semion sa iyang paghanduraw sa nangagi. Nakuyapan si Budoy/ Hesukristo tungod tingali sa kasakit sa latigo nga midapat sa iyang panit ubos sa nagligiting nga kainit sa adlaw. Ila kining gitabang. Nakita ni Semion nga si Padre Henry naglingi-lingi. Nalarawan sa panagway niini ang kabalaka, kay ang pasundayag wala pa man mahuman.
“Akoy mopadayon pagpas-an sa krus, Padred. Humanon ta ang pasundayag,” matod ni Semion nga gikatingala sa kadaghanan. Ug gipas-an ni Semion ang krus ug misugod sab ang paglapdos sa latigo sa ‘sundalo' sa iyang lawas. Miping-it ug miagulo sa kasakit si Semion, apan iya kining giantos. Sayod siya nga ining paagiha mapasaylo sa Ginuo ang iyang sala tungod sa pagluib niya kang Maria ug sa ilang mga anak.
Nagpahiyom si Padre Henry nga nagtan-aw kang Semion. Nasayod ang pari nga kinasingkasing ang pagsakripisyo ni Semion nga naghinulsol sa iyang mga sala. Nalipay ang pari ning pagbalik sa maluibon. (KATAPUSAN)