LOLA, 67, PUSHER’ NASIKOP
MAMA SA NAPATAY NGA `DRUG LORD' GI-BUY BUST SA PDEA 7
Lola nga giingong drug queen nadakpan sa buy bust operation, nakuhaag daghang putos sa shabu kagahapon sa alas 7:30 sa buntag sa Brgy. Matabang, dakbayan sa Toledo.
Si Virginia “Bely” Sanchez Jareño, 67, nadakpan sa mga agent sa Philippine Drug Enforcement Agency (PDEA7).
Si Virginia maoy inahan sa giingong drug lord nga si Jay Jareño, kinsa napatay sa mga sakop sa Regional Intelligence Division (RID-7)sa miaging tuig dihang nisukol atol sa buy bust operation. Si Agent Ian Von Tecson,
team leader sa PDEA7 nga nahinabi Superbalita Cebu, nagkanayon nga si Virginia “drug
queen” sa dakbayan sa Toledo. Gibutyag niya nga si Virginia maoy nihulip sa drug operation sa iyang anak nga namatay.
Matod ni Tecson nga si Virginia dugay na nga nalambigit sa pagpayuhot sa ginadiling drugas sukad pa kaniadto nga buhi pa si Jay.
Makabaligya kinig 500 gramos nga shabu matag simana, sagad sa mga kustomer gikan sa Toledo, Balamban, Asturias, Pinamungahan, ug ubang mga silingang lungsod.
Matod ni Tecson nga si Virginia nalakip sa ilang listahan sa mga high value target(HVT) sa Probinsiya sa Sugbo.
Ilang nakuha sa possession niini ang 58 ka putos nga shabu nga mobalor og P29,000, lakip ang P500 nga buy bust money.
Si Virginia nga nahinabi sa Superbalita Cebu nanghimakak sa pasangil ug mipadayag nga iyahang abagado nalang maoy iyang patubagon.
Gibutyag niya nga wa siyay kalambigitan sa illegal kay ang iyang negosyo trucking. /