MARIO BLANCO ANG MUSIKA SA DEKADA `70
Maihap na lang ang mga folksinger nga sama ka banggiitan mangantahay ni Mario Blanco. Ako siyang nahimamat dihang nihimo siya og one-night performance sa Quick Chow Buffet Restaurant sa dalan General Maxilom ning dakbayan. Atong balikan ang iyang kaagi uban sa mga sikat nga kanta sa dekada `70. Mario Blanco, Ssssuper Ka! Unsay mga paborito nimong kanta?
Folk ug country songs. Mga kanta nilang Jim Croce, James Taylor, Dan Fogelberg, CSNY (Crosby, Stills, Nash and Young), Simon and Garfunkel, England Dan and John Ford Coley, America, Beatles, Kenny Rankin, Kenny Rogers…
Mga pila kabuok imong nahibaw-ang kanta?
Di nako kaihap sa kadaghan, basta maka-straight ko og kanta three hours, non-stop, way estorya-estorya.
Pila na ka katuig nga folksinger?
As a solo artist, I think almost 30 years. Pero nagsugod gyud ko sa banda, high school pa ko way back 1970s. Combo pa'y tawag namo. I played as a bass guitarist. Didto mi nagdugay sa Camp John Hay sa Baguio, then nitukar mi og Xaipan ug Japan. Pagbungkag namo, diha ko nagsugod og research og mga kantang folk, rock and country.
Unsay sikreto nga nilungtad ka sa industriya?
Enjoy lang, mao gyud ni akong first love ang music. Naanad na lang akong tingog nga moinom kada gabii. Mas nindot man gud i-perform basta maka-inom gamay basta dili lang sad sobra. Ni-slow down na ko sa hard, beer-beer na lang.
Okay ra imong wife?
Haponesa man akong wife, 25 years na mi. Naa siyay company didto kay designer man siya sa Japan. Na-meet nako siya katong nagbanda pa ko sa Hyatt hotel sa Xaipan. From time to time, mag-adtongari ra ko. Wala mi anak.
Kinsay mga kauban nimo sa balay?
Daghan kog mga iro ug iring sa Guadalupe. Kay basta makakita akong misis og iring nga pagala-gala iya man dayong puniton kay maluoy siya. Ang iyang papa kay veterinarian man. Ang akong misis dunay 20 ka mga iro ug iring sa Japan. Ang uban iyang gipada nako. Mao nga bisag ako rang usa sa balay, alegre kaayo kay daghan man kog alaga.
Asa man ka magtukaran karon?
El Takito Mexican restaurant (atbang sa JY Square) every Tuesday, Casino Espanol every Wednesday, The Social (Ayala) ug sa MTV Adventure sa Guadalupe.
Unsay tan-aw nimo sa music sa una ug karon?
Ang music sa una kay ma-distinguish gyud nimo kinsay nagkanta: Beatles, BeeGees, America, Earth Wind and Fire, U2, Queen, naa gyuy identity. Unlike karon nga pare-pareho na lang ang style. Maong di na ta kaila kinsay mga nagkanta.
Naa pa ka’y ganahan himuon isip musikero?
Ganahan nako i-record ang akong mga cover songs aron naa sad koy handumanan ba inig labay sa akong panahon. Life is too short. Enjoy lang!