3 KA PULIS, 2 MGA OPISYAL, GIBALHIN

Girelibuhan ang duha ka mga police official nga mga sakop sa Police Regional Office 7 ug usa ka non-commission officer sa Camp Crame ug gilabay sa Mindanao sugod niadtong miaging semana sa wa pa matino nga hinungdan.

Ang maong mga pulis nakadawat og mando mao silang Police Supt. Joel Quintero, hepe sa Regional Special Operations Group 7, Police Supt. Nicomedes Olaivar, hepe sa Tagbilaran City police station ug ang iyang sakop nga si SPO4 Charito Aparecio.

Si Quintero gidestino sa Police Regional Office 9 sa Zamboanga samtang silang Olaivar ug Aparecio sa PRO 12.

Giangkon ni Chief Supt. Noli Taliño nga nakadawat siya sa maong kamandoan apan wala pa siyay kasayuran unsay hinungdan kon kini kabahin ba sa halapad nga lahugay nga gipatuman sa kapulisan lukop nasud.

Si Olaivar maoy nagkupot sa kaso ni Attorney Mia Manuelita Mascariñas-Green nga gibanhigan patay kapin sa usa ka buwan na ang nakalabay.

Apan ang usa ka negosyante nga gilabanan ni Green nireklamo sa PRO 7 nga bias ang mga pulis nga naghimo sa imbestigasyon human gipasagdan lang ang duha ka mga suspek nga nakabiya sa lalawigan sa Bohol.

Apan una nang mihimakak si Olaivar nga ilang gidapigan ang mga suspek.

Si Taliño nagkanayon nga dako og epekto kanila ang pagbalhin sa laing rehiyon ilabi na nga naghupot si Olaivar og dakong kaso.