Osmeña ginganlan og bakakon ni Garganera

Gitawag ni Konsehal Joel Garganera og bakakon si Mayor Tomas Osmeña human nipahibawo pinaagi sa iyang Facebook page nga ni-improved og 400 porsiyento ang koleksyon sa basura sa ubang dapit sa dakbayan.

Si Osmeña nidayeg kang kanhi konsehal Nida Cabrera kay bunga kini sa paningkamot sa kanhi konsehal hinungdan nga nakakuha og award ang City Goverment gikan sa Environmental Management Bureau gumikan sa maayong mga programa sa kalikupan.

“This, despite the fact that we’ve improved garbage collection by up to 400% in some areas (expanding to more as we speak),” tipik sa post sa mayor sa niaging adlaw.

Apan si Garganera nagkanayon nga wa niya makita ang kalambuan sa maayong pagkolekta sa basura inay nag-anam og kadaghan ang basura sa siyudad ug nagkadako ang gasto.

“Bakakon siya (Tomas). Ang atong operation sa una sa panahon ni Mayor Mike, we only spent P15 million something a month. Ila panang gidugaydugay sa Konseho. Karon P26 million a month? Asa ang 400 percent diha nga ni reduce ang atong collection?” padayag sa chairman sa committee on environment.

Iyang gikuhaan og basehan ang report ni kanhi Konsehal Roberto “Bob” Cabarrubias diin ang Siyudad nikolekta og 36,000 toneladas nga basura sulod sa buwan sa Enero ug Pebrero.

“Sa ato pa 18,000 tons per month. So, pila man naa? 600 tons per day. Kon imong itandi sa panahon ni kanhi Mayor Rama, aduna lay 450 ngadto sa 500 tons matag adlaw karon nilapas na. Kon pilay ilang gi-budget sa number of hauling sa basura, mao say ilang gi-budget sa number of tons,” paghulagway ni Garganera.

Siya ginganlan pa og ‘idiot’ ni Osmeña.

Apan iya kining gitubag nga gipalabi sa Court of Appeals ug ni Secretary Gina Lopez ang usa ka ‘idiot’ dihang gipasirad-an ang Inayawan dumpsite gumikan sa iyang gipasaka nga ‘writ of kalikasan’ batok sa mayor.