PROTESTA NI CORRO GIBASURA

Gibasura sa korte ang election protest nga gisang-at ni kanhi Daanbantayan Mayor Augusto Corro batok sa kasamtangang mayor nga si Vicente Loot.

Si Corro niduso sa protesta human nidaog lamang og pito ka botos si Loot batok niya sa eleksiyon sa miaging tuig.

Ang Regional Trial Court Branch 61 sa dakbayan sa Bogo nibasura sa election protest tungod sa kapakyas ni Corro pagtuman sa usa sa mga lagda alang sa filing niini, base sa Rules of Procedure in Election Contest Before the Courts Involving Municipal Elective Officials.

Base sa kamanduan ni Assisting Judge Ricky Jones Macabaya, napakyas si Corro sa personal nga paghatag o pag-serve og kopya sa iyang protesta ngadto sa iyang kaatbang nga si Mayor Loot.

Sa Sec. 4, Rule 2 sa Election Rules of Procedure, kinahanglang personal ang filing sa protesta ngadto sa korte ug personal sab nga i-serve ang kopya niini ngadto sa giprotestahan, gawas lang kon ang dokumento nagagikan mismo sa korte.

Ang kapakyas pagsunod niini, moresulta sa di gyud pagka-file sa petisyon o kaso.

Tungod niini, gi- dismiss ni Macabaya ang protesta nunot sa iyang gihulagway nga mere scrap of paper ang protesta ni Corro kay wa makonsiderar nga filed.

Gihangop ni Loot ang pagkabasura niini ug nagtuo siya nga gihimo lang sa iyang kaatbang ang kunahay nga pag-file og protesta batok kaniya aron paghatag og konsuelo sa iyang mga supporter sa miaging eleksiyon. Una nang niduso ni Corro sa election protest human nidaog lamang og pito ka botos batok niya ang kanhi police opisyal nga si Loot sa 2016 elections. “There is a basic procedure nga wala nila gituman and that procedure is very elementary. No lawyer will ever forget unless it is gituyo. Intentional in the sence nga dili nila gusto buksan, pampalubag loob lang sa ilang mga tawo para kunuhay nag-protesta sila,” niingon si Loot.

Tungod sa pagka-basura sa kaso, mas makatutok na si Loot sa pagpadagan sa ilang lungsod.

Nalipay usab siya nga sa pagka-karon, wa na siya makadungog og mga taho, diin gilambigit na usab ang iyang pangalan sa illegal nga drugas.

Una nang namahayag ang mayor nga mopasaka og reklamo batok sa mga tawo nga molambigit niya sa drugas. /