Panglawas ni Duterte

Way tawo nga di masakit. Ingon man way immortal kanato. May katarungan ang pagpangutana sa panglawas sa atong pangulo kay gikinahanglan ang kalagsik sa tawo nga nanimunil sa nasod.

Si Digong nanikmat di pa dugay sa kanunayng pagbagsa pangutana mahitungod sa iyang panglawas. May nakita man gud nga oxygenitor sa iyang lawak sa balay niya sa Davao City.

Mitingkag dayon ang mga dunggan sa iyang mga kritiko. Gamit sa mga paid hacks gibandilyo dayon kini sa media sa ingon nga wa makapugong si Digong namaghot dayon sa iyang mga kaaway.

Husto sad si Duterte sa iyang pagsiyaok: “Inyong Lolo wa mamatay! Way mohangtod nato because everybody will become a carcass in the end!” Kinsa man sad ang di maglagot sa kanunayng pagkuwestiyon sa iyang panglawas.

Wa man siya molimod sa iyang sakit nga aduna siyay serious migraine nga mo- recur, matag karon ug unya. Siya kuno maggamitan sa oxygenitor kon mohuot ang dughan tungod sa panigarilyo.

Matod pa, the test of the pudding is in the eating. Karong bag-o miduaw siya sa mga nasod sa Myanmar ug Thailand. Ang tawong masakiton lisod paglakang ug way ganang molakaw-lakaw.

Di angay kabalak-an ang iyang panglawas. Sa akong tan-aw “abtik pa sa turong baka”si Digong. Naa tuoy mga sakitsakit apan not so alarming nga makainutil sa iyang pagkatawo.

Let Digong do his job and end his 6-year term libre sa mga pagduda sa iyang panglawas. Si kanhi Mao Tse Tong sa China misubrag 80 anyos apan way nanghilabot sa iyang panglawas.

Si Lee Kuan Yu sa Singapore naniguwang na lang sa katungdanan niadto apan way nanguti-nguti sa iyang edad. Si Charles de Gaulle sa Fransiya nanggungis pud sa puwesto nga way nanghilabot.

'Ang kamatayon di damhon moabot lang baya aron mopauli ta sa yuta. Gisangyaw ni sa miaging “Badlis” markahag abo ang atong agtang. “From dust you come, hence to dust you return!”