'Fare surge'

Uyon ba kamo sa fare surge? Ang Cebu Integrated Transport Service Cooperative (Citrasco) maoy nipasaka og petisyon panahon sa rush hours, alas 7:00 sa buntag hangtod alas 9:00 sa buntag ug alas 5:00 sa hapon hangtod alas 7:00 sa gabii. Buot ipasabot nga pagpatong og P1.50 gikan sa minimum nga pletihan sa jeepney nga P6.50.

Ang Land Transportation Franchising and Regulatory Board (LTFRB) mopahigayon og public hearing sa petisyon sa Citrasco sa Cebu Normal University (CNU) sa dakbayan sa Sugbo karong buntag. Ang pagpadayag sa hunahuna sa naasoy nga hearing usa sa basihan sa hukom sa LTFRB sa pagtugot o salikway sa petisyon sa dakong kooperatiba sa transportasyon sa Sugbo.

Ang nagkagrabe nga trapiko sa dakbayan maoy nag-unang gitumbok sa Citrasco nga dakong alkanse sa ilang pagpamasahero human halos dili makalihok sa dalan sa gitumbok nga rush hours busa nangayo sila og patong plite sa maong panahon.

Sa habig sa mga pasahero, ang fare surge dugang nila nga abagahon nga gasto ug makaapekto sa ilang budget sa matag adlaw nga pagbiyahe. Kon buot hunahunaon, dili sala sa pasahero ang trapik ug sila ang pahamtangan sa 'silot' taliwala sa ilang paningkamot.

Pero, asa nagsugod ang ideya sa fare surge? Una kini nato nga nabati sa transportation network vehicle service (TNVS) sama sa Uber ug Grab cars. Dunay panahon nga motaas ang plite nga depende sa demanda ug kahimtang sa trapiko. Pero sagad adunahan ang mosakay ug nindot sab ang sakyanan.

Ang duha ka mga habig pahero nga dunay punto ug parehong nasakop sa masa nga kanunay apektado sa dili maayong pagdumala sa kagamhanan, sama sa trapiko. Maayo nga kini matan-aw pag-ayo sa LTFRB aron mahimong mahuluganong ahensiya sa kagamhanan, dili nagdugang lang sa burukrasya sa proseso.