See you in my heart
Dugay nga nakatubag si Randy. Miduko siya. Hinay na lang ang among paglakaw kay duol na kaayo mi sa among balay.
“Nganong di mo man kauban si Sandra, Ran?” Miusab kog pangutana.
Mitan-aw si Randy nako. Miginhawa siyag lawom.
“Wa na mi, Sha. Nakigbuwag siya nako.” Nakalitan ko pero kadyot ra. “Uy, ngano man intawon?
Sweet man kaayo si Sandra nimo?”
“Tungod sa selos. Grabe ang iyang pagduda nga nagluib ko niya.”
“Selos? Kinsa may iyang gipangabubhoan?” “Ikaw.” “H-Ha? Ako? Unsang pagkahitaboa nga nahitabo man na? Dugay-dugay na man gani tang wa magkita?” Nahingangha gyud ko.
“Kanunay man gud tikang gihisgotan niya. You know, Sha, di gyud nako kalikayan nga ibida tika niya. Kanunay kong gisulti niya nga duna na gyud koy kumare nga guwapa ug seksi.”
Wa ko makatingog nga mitutok pag-ayo kang Randy. Namatngonan ko ang pag- bluh sa akong nawong. Guwapa? Seksi? Hilom kong nalipay sa pagdayeg ni Randy nako.
“Mituo diay siya nimo? Wa gyud niya mahunahuna nga nagkumedya ka lang niya?”
“Wa man ko magkumedya niya, Sha. Tinuod man ang akong gisulti niya nga guwapa ug seksi ka.”
Nabatyagan ko na sab ang pagpamuwa sa akong nawong. Nakaduko ko. Gusto kong ipalain ang among gihisgotan.
“Uy, nia na man diay ta sa among ba’ay, Ran. Dayon sa.”
“Salamat na lang, Sha. Sa sunod higayon na lang. Karon nga nakatultol na ko dinhi sa inyo, kanunay na kong mag-anhian.”
Wa ko makatingog. Morag nablangko ang akong hunahuna. Kalit kong namatngonan ang kusog nga pagbutuk-butok sa akong dughan. Kanunay mamisita si Randy nako? God! Hilom kong nakaingon. “Sige, Sha, mopauli na ko.” Wa koy tingog nga mitando. Nagbuka ang akong baba apan way pulong nga akong nasulti. Gisundan ko sa pagtan-aw si Randy nga milakaw na pahilayo nako. Unya nagdali kong misulod sa among balay dihang wa na si Randy. Milargo kog sulod sa akong kuwarto. Wa ko makasabot sa akong kaugalingon niadtong tungora. Gibati ko kaayo ang subrang kalipay. Morag gusto kong magluksu-lukso sa kalipay.
Gitawgan dayon nako si Carol sa selpon. Puwerte niyang katawa pagsulti ko na sa akong gibati niadtong tungora. Dasig kong nakig-estorya niya.
(TAPUSON SUNOD GULA)