VECO SA DSWD 7 HOME FOR GIRLS
Nahimong mas halandomon ang Valentine’s Day alang sa 60 ka mga residente sa DSWD Home for the Girls sa Barangay Labangon tungod sa pagpahigayon og usa ka post- Valentine activity sa Visayan Electric Company, Inc., (VECO) niadtong Pebrero 18.
Ang maong aktibidad gipangunahan sa Reputation Enhancement Division sa VECO ug gisalmotan sa 20 ka mga empleyado nga niboluntaryo para sa maong kalihokan.
Ang DSWD Home for Girls sa Barangay Labangon usa ka puloy-anan sa mga babayeng menor de edad nga gipang-abandonar sa ilang mga ginikanan ug sa mga biktima sa pang-abuso.
Ang mga batan-on sa maong balay dangpanan nalingaw sa mga duwa nga giandam sa
volunteers ilabi na gayud sa sayaw nga gidalit ni Jollibee.
Aron ipakita ang ilang pagpasalamat sa mga empleyado sa VECO, ang mga menor de edad nga nagpuyo sa DSWD Home for the Girls mipakita usab sa ilang kamaayo sa pagsayaw ug pagkanta.
Nag-andam usab og lamian nga paniudto ug mga grocery
items ang VECO alang sa mga nagpuyo sa balay dalangpan.
Si VECO Kaibigan Marlyn Ruiz, usa sa mga volunteer, nagpasalamat sa mga tigpasiugda sa maong kalihokan kay matod pa niya, kini usa ka nindot nga paagi sa pagpaambit sa ilang oras sa mga biktima sa pagpangabuso ug sa mga bata nga giabandonar sa ilang mga ginikanan.
Si Ruiz, kansang bana empleyado usab sa VECO, walay anak sa 27 anyos nga kaminyoon. Ang pagbisita sa mga VECO Kaibigans sa DSWD Home for the Girls mihatag kaniya og higayon nga masinati ang pagka-inahan bisan sa pipila lamang ka oras.
“Wala gayud ko nagduhasa pagsalmot sa maong kalihokan kay bisan pa og sa pipila lamang ka oras, nakatabang ko sa paglingaw sa mga menor de edad sa balay dalangpan sa DSWD,” matod ni Ruiz.
Ang VECO aktibo sa pagpahigayon og non-energy community outreach programs sa sulod sa iyang franchise area, ilabi na ang mga programa alang sa kabatan-onan.