4-0 TUYO SA STAR

Mga duwa karon

4:15 pm- Star Hotshots batok Mahindra 7:00 pm- Ginebra batok GlobalPort

Mosuway pagkuha og bahin sa liderato ang Star Hotshots sa ilang pagpakigbatok sa Mahindra Flood Busters sa premirong duwa karong hapon sa Philippine Basketball Association (PBA) Commissioner’s Cup sa Mall of Asia Arena sa Pasay City.

Sa main game, gilauman ang usa ka makapaukyab nga kombati sa panagtagbo sa Brgy. Ginebra Gin Kings batok Global Port Batang Pier.

Una maghunahuna ang Hotshots nga ikauban nila ang Alaska Aces sa liderato, ang Hotshots magkinahanglan unang motutok sa ilang pagpakigparang sa dili pamilyar nga kontra, ang bag-ong import sa Flood Busters nga si Keith Wright.

Si Wright maoy gihulip kang James White, kinsa nag- average og 30.5 puntos, 18.5 rebounds ug league-high 2.5 block shots sa 1-3 nga rekord sa Flood Busters.

Impresibo man tuod moduwa si White apan nakadesisyon ang Flood Busters nga hulipan kini gumikan kay mosupak kini kamanduan ni deputy coach Chris Gavina.

Sa paghulip ni Wright, kinsa nakaduwa sa Austin Spurs ug Westchester Knicks sa National Basketball Association (NBA)-League, ang Flood Busters makapahimulos og usa ka 6’8” nga import nga makaitsa sa gawas nga bahin.

Apan ang mas importante alang kang Gavina, ang 27 anyos nga si Wright mas epektibo sa depensa nga alang kaniya maoy gikinahanglan sa ilang puwersa.

“I feel we have stuck to our defensive identity the past couple of games. We just need to do a better job at reducing our lapses on the defensive end and being more efficient on the offensive end. That takes confidence,” asoy ni Gavina sa interbyu sa Spin.ph.

Ang kapabilidad ni Wright nahasol sa hunahuna ni Star coach Chito Victolero.

“We don’t know who will be playing as their import tomorrow, so we have a hard time preparing for them,” batbat ni Victolero.

Sa laing duwa, ang import sa Ginebra nga si Justin Brownlee gilaumang himsog ug makakombati na’g insakto ning higayuna ug mao sab kini ang sitwasyon sa pambato sa GlobalPort nga si Terrence Romeo, kinsa usa ka eksplosibong pointguard sa liga.

Gumikan kay adunay gipamati sa lawas, sila si Brownlee ug Romeo parehong limitado ra og oras sa labing ulahi nilang pagduwa.

Ang Gin Kings ug Batang Pier pulos wala pa nakatilaw og kadaugan. Ikatulo kini nga duwa sa Batang Pier samtang ikaduha sa Gin Kings.