Koncz gi-TKO ni Arum

Morag naigo sa uppercut ni Top Rank promoter Bob Arum si Michael Koncz, adviser ni Manny Pacquiao, sa dihang nitukma ang pangagpas sa beteranong promoter nga kadudahan ang negosasyon sa Pacquiao-Amir Khan fight nga kunohay gipaluyohan sa mga dagkong negusyante sa United Arab Emirates.

Kadto maoy nakapakgang sa hayag na unta nga negosasyon diin si Pacquiao (596-2, 38KOs) giparang ni Arum sa Australianong fighter nga si Jeff Horn (16-0-1, 11 Kos).

Linghod ug di man tuod inila si Horn apan makaagni usab kini og crowd kon adto sa ilang lugar sa Brisbane, Australia ipahigayon ang maong away.

Sa iyang pagkabeterano sa boxing promotion nasigpatan ni Arum nga mokita ang maong away ug wala pay risgo sa habig ni Pacquiao.

Pero aduna sab diay laing plano si Koncz nga mialkontra sa kang Arum. Gusto ni Koncz nga makakita og gold nga mas labaw pa sa kang Arum apan diay pangitaunon pa.

Daan na silang gipasidan-an sa 81-anyos nga boxing promoter nga posibling dakong ilad ang maong negusasyon ilabi na kay way pangalan nga gibutyag si Koncz kon kinsa gyud ning tawhana ang iyang gika-negotiate.

So dali ra usab kaayong nisakay si Pacquiao sa ablani Koncz kay tiaw mo bay $38 million ang gitanyag sa ilang partner sa UAE nga wa nila hinganli.

Resulta? Palpak ug bisan og anino sa tawo nga mipasalig way gikabutyag si Koncz. Pagbakwi sa iyang kauwaw, si Koncz makig-ayuda na ni Arum aron mahinayon ang Pacquiao-Horn fight.

Dawat na lang ni siyag limpyo kay negotiated na man ni daan ni Arum ang kampo ni Horn. Nauswag ang petsa sa Hulyo 2 ning tuiga. Sayang kay nakabooked na ra ba si Erwin Lirazan aron unta mo- cover sa away ug mobakasyon. Si Erwin mahinayon, pero ang away dili pa.

Aduna meeting sports commission sa Cebu Provincial Capitol nga gipangulohan ni Atty. Ramil Abing sa mga coordinators sa matag lungsod nga niapil ug nisuporta sa umaabot nga Governor’s Cup basketball 21-under tournament.

Moabot ngadto sa 38 ka mga lungsod nga gibahin ngadto sa upat ka Cluster ang magtigi sa maong kompetisyon. Tumong niini mao ang pagdevelop sa grassroots level sa probinsiya sa Sugbo. Sugdan kini karong Abril 9 diha sa Cebu Coliseum pinaagi sa usa parada sa tanang partisipante.

Pero taympa una. Mora mag maghuot kining 38 ka mga teams sa Coliseum. Mas maayo siguro og ang opening ari ipahigayon sa Cebu City Sports Complex unya ang duwa adto na sa Cebu Coliseum, Atty. Sugyot lang.