Han-ay na tanan: Arum
Maayo ang dagan sa tanan kabahin sa negusasyon alang sa panagharong nila ni Filipino boxing icon Manny Pacquiao ug Australian Jeff Horn, matod ni Top Rank boss Bob Arum.
Ang negusasyon ning awaya ningsubay sab og libaong nga mga dalan ug giingon pang dili na kini madayon human nakignegusasyon og lain ang adviser ni Pacquiao nga si Michael Koncz aron ikaharong sa Pambansang Kamao sa Pilipinas si British star Amir Khan sa United Arab Emirates.
Apan dihang nasuta nga wala’y klaro ang gikasabot ni Koncz alang sa Dubai nga away, hayan nabuhi pagbalik ang gitrabaho ni Arum sa Australia.
“As far as I’m concerned, everything is done,” batbat pa ni Arum sa interbyu sa www. boxingscene.com kabahin sa Pacquiao-Horn fight. “There are some little strings, but they don’t amount to much.”
Giklaro ni Arum nga dili tinuod nga gihatagan niya og tagal si Pacquiao aron mosanong sa pagpakigbatok sa di iladong si Horn.
Gipasabot niya nga kinahanglan lang niyang mapahibalo ang iyang gikasabot sa Australia nga nisugot na ang fighting senator sa Pilipinas aron makatikang og laing lakang ang negusasyon.
“Right now, we’re finishing up all the contracts,” batbat ni Arum.
Matod ni Arum nga sulbaron niya ang mga isyu kabahin sa negusasyon kon mapirmahan na ang mga kontrata.
Ang away giplanuhang ipahigayon karong Hulyo 2 sa Brisbane, Australia.