RUSSELL MAAYO NGA KAUBAN
Nanghakot si Russell Westbrook og triple-doubles sa kasamtangang season sa National Basketball Association (NBA) nga wala’y nakahimo sulod sa kapin na sa tunga sa siglo. Apan ang makasaysayong statistics ug bayanihong binuhatan ni Westbrook natubanan sa dako niyang kausaban gikan sa pagtuo sa kadaghanan nga dili siya maayo nga kauban.
Adunay mga mikuwestiyon kon unsa kaha nga klase nga kauban si Westbrook sa dihang mibiya si Kevin Durant sa Thunder aron motapon sa Golden State Warriors.
Unya mas dako ang pangutana kon unsa kaha’y mahitabo sa Thunder karon nga bugtong si Westbrook ang ilang lider.
Ang tanan gitubag ni Westbrook pinaagi sa iyang gipakita nga duwa. “He’s making big plays,” asoy ni Thunder center Enes Kanter.
“That’s what a big player does. And he’s making everybody better around him.”
Gisaka ni Westbrook ang iyang talento sa lain nga andana ug iyang gidala ang iyang mga kauban. Bisan unsa’y gikinahanglan sa Thunder – krusyal nga puntos, magdilaab nga opensiba, pagpasa sa bola, depensa ug uban – tanan nahatag ni Westbrook.
“As a team, we all do our part,” pasabot ni Westbrook. “It’s not just me. I’m not just playing by myself.”
Si Westbrook nakapundo na og 40 ka triple-doubles ug usa na lang ang iyang gikinahanglan aron matupngan ang rekord ni Oscar Robertson niadtong 1961-62 season nga 41 ka
triple-doubles sa usa ka season. Ang Thunder, nga naggunit og 43-33, aduna pa’y nahabiling unom ka mga duwa hinungdan nga dako og poruhan nga matupngan o kaha maapsan ni Westbrook ang dugay nang rekord ni Robertson.
Ang Thunder adunay 31-9 nga rekord sa mga duwa nga naka- triple double si Westbrook ug 12-24 kon wala.
Ang basketball IQ, leadership ug pagsalig ni Westbrook sa iyang mga kauban dili ikalimod nga miumento hinungdan nga maayo ang dagan sa Thunder. “He manages the game so much better than he used to,” asoy ni Thunder forward Nick Collison.
Si Westbrook nag- average og triple-doubles nga 34.3 puntos, 11.1 rebounds ug 11.3 assists.