WESTBROOK MISIAK OG RECORD SA NBA
Una, gibuak ni Russell Westbrook ang dugay na’ng rekord ni Oscar Robertson sa padaghanay og triple-doubles sa usa ka season. Unya pagkahuman niini, iyang gisamaran ang kasingkasing sa Denver Nuggets.
Ang buzzer-beater jumper ni Westbrook maoy nakahatag sa Oklahoma City Thunder og 106-105 nga kadaugan batok sa host Nuggets kagahapon sa National Basketball Association (NBA).
Gumikan sa kapildihan, hingpit nang nawad-an og paglaom ang Nuggets nga makaabante sa playoffs.
Ang Nuggets natagak sa 38-42 nga rekord ug bisan modaog pa sila sa nahabilin nilang duha ka mga duwa, dili gihapon kini makatabang aron makataak sila sa playoffs.
Nagmangtas si Westbrook ug nagpakatap kini’g 50 puntos, 16 rebounds ug 10 assists aron irehistro ang iyang ika42 nga triple-double sa season, labaw og usa sa nahimo ni Robertson sa Cincinnati Royals niadtong 1961-62 season.
Ang mga tumatan-aw nag- standing ovation kang Westbrook dihang iyang nabuak ang rekord sa iyang ika10 nga assists sa nahabiling 4:17 minutos. Grabe ang depensa sa Nuggets apan wala kini nakapakgang sa kabangis sa duwa ni Westbrook. “It was a good defense,” asoy ni Nuggets guard Gary Harris. “He’s had a hell of a season. I think he might have just locked up the MVP with that one right there.” Si Westbrook nakatali na og
double-double sa halftime ug taodtaod sab una niya nakompleto ang laing triple-double.
Sa nahabiling kapin sa 4:00 ka mga minutos, naposte ni Westbrook ang iyang ika-10 nga
assists dihang natunolan niya si Semaj Christon alang sa usa ka 3-pointer nga naghatag sa
Thunder og 101-91 nga labaw.
“Pure adrenaline, emotions running high, game-winning shot, it is something you dream about as a little kid to be able to do that on the road especially from that distance,” dugang ni Westbrook. “It is something you definitely will never forget.”
Si Westbrook maoy nimugna sa katapusang walo ka mga puntos sa duwa diin niadtong hugayuna, ningbahar og sakto ang opensa sa Nuggets. “I give him credit, he is a hell of a player and an MVP candidate,” pagdayeg ni Nuggets coach Michael Malone kang Westbrook. “(But) I really feel that we lost this game.”