HAWKS, NO.5
Naselyuhan sa host Atlanta Hawks ang No.5 nga luna sa Eastern Conference human nila gidakit sa dakong kapildihan ang Charlotte Hornets, 103-76, kagahapon sa National Basketball Association (NBA).
Ning maong kadaugan, ang Hawks nakahan-ay og engkuwentro batok sa No. 4 Washington Wizards alang sa 1st
round sa playoffs. Ang Hawks, nga ningposte sa ikaupat nilang sunodsunod nga kadaugan, ningsaka sa 4338 nga rekord ug bisan unsa pa’y mahitabo sa katapusan nilang duwa sa regular season, dili na kini makaapekto sa ilang dalan nga subayon sa playoffs.
Ning-agi sab og malisod nga dala ang Hawks una nila naabot ang ilang nahimutangan karon, gani adunay higayon nga mitiglom ang ilang paglaom nga makasulod sa playoffs apan nakabawi sila pinaagi sa pagposte’g sunodsunod nga kadaugan sa tungatungang bahin sa regular season. “We’ve been here before,” matod ni Atlanta coach Mike Budenholzer. “We need to stay humble, stay edgy and remember why we’re playing better lately. Last four games it’s been a simple message -- compete, stay together -- and guys are doing that well.”
Ang kadaugan gipangulohan sa beterano nilang sentro nga si Dwight Howard, kinsa nagpakatap og 19 puntos ug 12 rebounds, samtang ningdugang og 10 puntos matag usa sila si Paul Millsap ug Ersan Ilyasova.
Ang tanang mga magduduwa sa Hawks nga ningpakita og aksyon pulos nakatampo sa opensa hinungdan nga nadominar nila ang kombati.
Sa sayong bahin, kontrolado na sa Hawks ang duwa ug nakamugna dayon sila og 3826 nga labaw nga ilang giinat ngadto sa 63-44 sa halftime.
Nagpadayon ang kabangis sa hangtod nga niabot pa og 34 puntos ang ilang labaw sa hinapos nga bahin. “Good performance,” dugang ni Budenholzer.
Ang Hornets, nga nakahuman na sa tanan nilang tahas sa regular season, nanamilit dala ang 36-46 nga baraha.
Ang panagparang sa Hawks ug Wizards maoy labing unang nalansang sa 1st round sa playoffs sa East.
Naghuwat pa og kontra ang No.1 Boston Celtics, No.2 Cleveland Cavaliers, ug No.3 Toronto Raptors. Nakaseguro na sab og luna sa East playoffs ang Milwaukee Bucks apan wala pa sab sila’y kontra.
Duha na lang ka mga luna ang giilugan sa East ug ang mag-ilog niini mao ang Indiana Pacers, Chicago Bulls ug Miami Heat nga masayran lang human sa mga kombati karong adlawa.
Sa Western Conference, nasayran na’ng daan ang tanang mga nakasulod sa playoffs ug ang posisyon na lang maoy giilugan.